Ndërsa Serbia shton përpjekjet për tërheqjen e njohjeve për Kosovën, Prishtina intensifikon fushatën për t’i mbrojtur ato. Diplomatët kosovarë po zhvillojnë takime me homologë të tyre, nga vendet që Serbia pretendon se e kanë tërhequr njohjen e Kosovës.
Në fillim të janarit presidenti Aleksander Vucic deklaroi se 9 shtetet e kanë bërë një hap të tillë dhe një i 10-të pritej ta bënte së shpejti: Somalia, Burkina Faso, Gaboni, Esvatini, Libia, Guniea, Antigua dhe Barbuda, Shën Lucia dhe Maldivet.
Ministri i Jashtëm i Togos konfirmoi të hënën në Beograd tërheqjen e njohjes, ndërsa shefi i diplomacisë serbe pohoi se shtetet që e kanë bërë diçka të tillë janë 27.
Por ministrja e Punëve të Jashtme dhe Diasporës e Kosovës, Donika Gërvalla, tha se çnjohja e Kosovës nga Togo “ka ndodhur që në vitin 2019”.
“Të gjithë të ekzaltuarve rreth “ç’njohjes” së Togos dhe propagandës së Dacicit dua t’iu rikujtoj që ajo ka ndodhur në vitin 2019, pra shumë kohë para se vinte në detyrë kjo qeveri. Kosova do ta fitojë betejën e saj sot, ashtu siç e ka fituar në 1999. Me mençuri, trimëri, guxim, sakrificë e plot miq e aleatë anembanë botës së lirë dhe demokratike”, deklaroi ajo.
Zyrtarët kosovarë po ashtu kanë bërë publike takimet e tyre me përfaqësuesit e disa prej shteteve, që gjenden në listën e prezantuar nga Vucici, si pjesë e përpjekjeve për tëhedhur poshtë pretendimet e liderit serb për tërheqjen e njohjeve.
Takime janë zhvilluar mes ambasadorëve të Kosovës, dhe atyre të Somalisë, Libisë, Gabonit e Maldiveve, ku sipas njoftimeve të publikuara nga diplomatët e Kosovës, është diskutuar për thellimin e marrëdhënieve mes vendeve.
E megjithatë në shumicën e rasteve, takimet nuk janë publikuar në llogaritë në rrjetet sociale të shteteve në fjalë. Që nga shkurti i vitit 2021 kur u vendosën marrëdhëniet diplomatike me Izraelin, Kosova nuk është njohur nga asnjë shtet tjetër.
Dhe pavarësisht pretendimeve të Serbisë, autoritetet në Prishtinë nuk kanë ndryshuar numrin e njohjeve, duke thënë se janë 117 shtete që e njohin pavarësinë e saj.
