Qytetarët e Shqipërisë të dielën do t’u drejtohen kutive të votimit në zgjedhjet parlamentare, të cilat konsiderohen ndër më të rëndësishmet për të ardhmen e Shqipërisë. Atyre u ka paraprirë një fushatë agresive mes partisë në pushtet dhe koalicionit të bashkuar rreth së djathtës, të cilat kulmuan edhe me vrasje në Elbasan.
Megjithëkëtë, analistët nuk parashohin ndonjë incident të madh i cili do t’i cenonte zgjedhjet, përkundër retorikës së ashpër.
“Në përgjithësi duket se do të jetë një proces pa probleme substanciale, ndonëse në nivelet e larta të politikës ka gjuhë të konfliktit verbal. Madje, në këtë debat është përfshirë edhe presidenti i Republikës, që duket se është në pozicion opozitar”, ka thënë analisti Aleksandër Çipa.
Sipas Çipës, ky agresivitet vjen për shkak të mundësisë së një rotacioni politik.
Partia Socialiste (PS) e drejtuar nga kryeministri Edi Rama kërkon një mandat të tretë qeverisës. Partia Demokratike (PD) e drejtuar nga Lulzim Basha, që kryeson koalicionin opozitar, kërkon ta marrë drejtimin e vendit, pas 8 vjetësh në opozitë.
Akuzat nuk kanë munguar as ditën e heshtjes zgjedhore, ku Partia Demokratike në Sarandë akuzoi partinë në pushtet se të shtunën ka shpërndarë leje legalizimi.
Aktiv ka qenë edhe presidenti Ilir Meta, i cili në dy konferenca për media ka ftuar prokurorinë që ta zbardhë sa më shpejt vrasjen në Elbasan.
Thirrjet e fundit për përmbajtje i kanë bërë edhe diplomatët e huaj, derisa ambasadorja e SHBA-së të shtunën ka takuar kryetarin e PD-së, Lulzim Basha.
Megjithëkëtë, ambasadorja tha se nuk mbështet asnjë kandidat apo parti politike.
Në një postim tjetër në Facebook, Ambasada amerikane në Tiranë thekson se është gati ta bëjë vëzhgimin e zgjedhjeve në të gjithë Shqipërinë.
Ndërkohë, Komisioni Qendror Zgjedhor ka filluar shpërndarjen e materialeve zgjedhore nëpër Komisionet e Qendrave të Votimit.
Zgjedhjet parlamentare të vitit 2021 zhvillohen me një kod zgjedhor që ka pësuar ndryshime dhe është përmirësuar, sipas rekomandimeve të OSBE/ODIHR-it. Dy ndryshimet kryesore janë hapja e listave të kandidatëve, si dhe identifikimi biometrik i votuesve.
Nga të dhënat e Drejtorisë së Përgjithshme të Gjendjes Civile, të drejtën e votës e kanë mbi 3 milionë e 500 mijë shqiptarë.
