Partitë pro serbe dhe pro ruse janë fituese të zgjedhjeve të pjesshme vendore që u mbajtën të dielën në Malin e Zi.
Në bazë të rezultateve paraprake, Partia Demokratike e Socialistëve të Presidentit aktual Milo Gjukanoviç humbi në 11 nga 14 komunat ku u mbajtën votimet, përfshi këtu edhe Podgoricën.
Ndonëse në shumicën e komunave partia proeuropiane e Gjukanoviç ka marrë më shumë mandate, ajo për shkak të shanseve te pakta për të krijuar koalicione paszgjedhore nuk do mund të qeverisë në pushtetin vendor në shumicën e këtyre komunave.
Kështu, në Podgoricë mediat malazeze flasin për një koalicion të mundshëm të “Fronti Demokratik”, “Demokratëve” dhe partisë së sapo themeluar “Evropa Tani”, e cila në fakt konsiderohet edhe si fituesja e zgjedhjeve të së dielës, pasi arriti të marrë 13 mandate.
Përveç Podgoricës, Partia Demokratike Socialiste me aleatët e vet humbi Danilovgradin, Kolashinin, Zhablakun, Plevlen, kurse arriti të mbajë pushtetin në Bijelo Pole dhe Tivar.
Fronti Demokratik pro-serb arriti ta ruajë pushtetin në Budva.
Përtej rëndësisë që kanë për qeverisjen e pushtetit vendor, zgjedhjet e pjesshme të së dielës ishin edhe një test mes dy grupimeve politike, ku në njërën anë qëndronin partitë e promalazeze të udhëhequra nga Milo Gjukanoviç dhe në anën tjetër ishin partitë që fituan zgjedhjet e vitit 2020, të njohura ndryshe edhe si grupimi pro rus dhe pro serb.
Zgjedhjet e 23 Tetorit konfirmuan gjithashtu Partinë Ura të Dritan Abazoviç si një forcë politike e rëndësishme tashmë në Malin e Zi, pasi ajo ka mundur të sigurojë një rezultat pozitiv, krahasuar me zgjedhjet pararendëse.
Tv Klan
