Pakti midis Italisë dhe Shqipërisë për të ngritur qendra të izoluara për trajtimin e emigracionit të parregullt ka tërhequr vëmendjen e shteteve kryesore europiane. Duket se rrëshqitja politike e Europës djathtas dhe rreziku i ngritjes së ekstremit të djathtë, ka bërë që edhe Anglia dhe Gjermania ta shikojnë këtë zhvillim me pozitivitet dhe përfitues nga ana financiare për shtetet e tyre.
Duket se një formulë e re ka hyrë në kancelaritë evropiane: pikat e jashtme të nxehta, qendrat e riatdhesimit jashtë BE-së ku mund të ndalojnë emigrantët në pritje të përgjigjeve për kërkesat për azil. Me anë të një letre, shefja e Komisionit Europian u kërkoi krerëve të shteteve dhe qeverive të “eksploronin” mundësinë duke nxjerrë “mësime nga Protokolli midis Italisë dhe Shqipërisë”.
Disa liderë të BE-së kanë kritikuar më parë skemat për përpunimin e jashtëm të azilkërkuesve, siç është marrëveshja e qeverisë së mëparshme të Mbretërisë së Bashkuar me Ruandën, por tani ka një oreks në rritje në BE për një qasje të ngjashme. Gjermania, dikur një zë relativisht liberal për emigracionin, është bërë më e ashpër dhe mendohet se nuk ka gjasa të bllokojë nisma të tilla. Gjermania, e cila ka shpallur rregullore të reja kufitare pas sulmeve të dyshuara islamike dhe rritjes së partive politike të ekstremit të djathtë kundër imigracionit, është veçanërisht e prirur të shohë se si funksionon marrëveshja.
Dhe gjatë një vizite në Romë muajin e kaluar, kryeministri i Mbretërisë së Bashkuar, Keir Starmer, vlerësoi përpjekjet e Melonit për të reduktuar flukset e migracionit, duke thënë se “qeveria e tij e pragmatizmit” kërkonte qasje të reja për menaxhimin e çështjes. Mbështetësit e modelit gjithashtu besojnë se është më humane sesa praktika aktuale e BE-së për të hedhur miliona euro në vendet e Afrikës së Veriut si Tunizia dhe Egjipti, si dhe Mauritania, për të rritur kontrollet e tyre kufitare për të bllokuar emigrantët që të arrijnë në BE.
Por, konservatorët britanikë janë kundër. Kandidati për udhëheqje konservatore, Robert Jenrick tha se kampet e stilit italian jashtë BE-së nuk do të kenë sukses.
Një reagim negativ ka pasur edhe Spanja. Qeveria socialiste e Pedro Sanchez ka refuzuar propozimin për krijimin e qendrave të azilit në vendet jashtë Bashkimit Evropian. “Politika e migracionit që po zhvillojmë tashmë po funksionon”, tha zëdhënësja e qeverisë, duke e kundërshtuar kategorikisht një plan të tillë.
E kundërta pritet të ndodhë. Qeveria e kryeministrit spanjoll Pedro Sanchez planifikon që të shfrytëzojë objektet e një aeroporti privat për ta kthyer atë në një qendër pritje për emigrantët ilegale.
