Kuvendi i Kosovës do të përpiqet për herë të tretë të konstituohet këtë të shtunë, pas dy tentativave të dështuara, ku opozita ka refuzuar të votojë raportin e Komisionit të Verifikimit të Mandateve në mungesë të dorëheqjes nga kryeministri Albin Kurti dhe kabineti qeveritar.
Seanca që ishte parashikuar të niste nga ora 12:00, pritet të nisë më vonë pasi kryesuesi i saj, Avni Dehari nga Lëvizja Vetëvendosje ka ftuar për konsultë partitë politike, me qëllimin për t’i dhënë zgjidhje situatës.
Sipas kreut të LDK-së, Lumir Abdixhiku kryesuesi i seancës, Avni Dehari, duhet të respektojë skenarin për seancën e përgatitur nga Sekretariati i Kuvendit, e jo atë të partisë së tij, LVV-së.
Pas seancës së 17 prillit, LDK dhe PDK shpërndanë një skenar të seancës, ku thuhej se raporti i Komisionit për verifikimin e mandateve duhej të hidhej sërish në votim, gjë që nuk ndodhi.
Kreu i LDK-së tha se është “interes kombëtar që institucionet të formohen”. Abdixhiku deklaroi se nuk po kërkon që shteti të mbetet pa kryeministër, por Albin Kurti duhet të zgjedhë nëse dëshiron të jetë deputet apo kryeministër në detyrë.
“Nuk po themi që të mbetet Qeveria pa kryeministër, por duhet të zgjedhë, ose deputet ose kryeministër”, tha ai.
Kryetari i PDK-së, Memli Krasniqi, i cili iu përgjigj pozitivisht ftesës së Deharit për takimin e sotëm konsultativ tha se forca e tij politike është e gatshme për t’i dhënë drejtim konstituimit të organeve.
“Dua t’ju them shumë qartë jemi këtu për të konstituar Kuvendin dhe për të dhënë pastaj drejtim konstituimit të organeve tjera siç kanë dalë nga zgjedhjet… I ftoj deputetët të jenë në sallë për të votuar…”, tha kreu i PDK.
