Në fshatin Muçias të bashkisë Divjakë fermerët kanë mbjellë shegë që piqet në muajt e verës, dhe tashmë në shtator vjelja e tyre është drejt fundit.
Ky është një varieti i rrallë, pa fara, i frutit të vjeshtës, i cili i mungonte tregut vendas. Plantacioni i ndërtuar nga Llambi Sota është i vetmi i këtij lloji në vendin tonë.
Bimët kanë ardhur nga Italia, ndërkohë që varieteti është izraelit. Janë dashur katër vite për të futur në prodhim me kapacitet të plotë dhe sot kërkesat për shegën janë të mëdha. I gjithë prodhimi po shitet nga 230 lekë deri 280 lekë për kilogram.
”Kam rreth 13 dynym shegë, e kam marrë nga Italia, një variete izraelite, kemi bërë këtë investimin dhe duam të punojmë si familje duke qëndruar në vendin tonë. Deri tani jemi mirë.”, tha LLambi Sota fermer në Muçias.
Pas 27 vjetësh në Itali, kjo familje është kthyer përfundimisht në vend lindje për tu marrë me plantacionin e shegëve. Rajmonda Sota tregon pse zgjodhën të mbillnin diçka që mungonte në tokat e fermerëve dhe jo perime apo pemë të tjera të cilat mbillen me shumicë në Divjakë.
”Deri tani jemi të kënaqur me frutin që kemi me cilësinë, me tregtarët që na marrin frutin shpresojmë që nga viti në vit ky varietet të na eci.”, thotë Rajmonda Sota.
Burrë e grua punojnë gjithë vitin në pemtore, ndërsa në periudhën e vjeljes kthehet edhe djali nga Italia për ti ardhur në ndihmë. Mungesa e krahut të punës mbetet një problem.
”Punëtor është vështirë të gjesh, do rri disa ditë dhe më pas do të nisem për në Itali, me sa mundësi të kem do ti ndihmojë prindërit.”, thotë Krenar Sota.
I gjithë prodhimi i këtij varieteti të shegës tregtohet brenda vendit kryesisht në rrethet Tiranë, Durrës, Korçë dhe Lushnjë.
Çmimi është i leverdishëm për kultivuesit për shkak se nuk ka konkurrencë në treg. Megjithëse vjelja e parë nis në muajin gusht, prodhimi i këtij varieteti vazhdon deri në dhjetor.
