Presidenti amerikan Joe Biden, pritet të takojë të mërkurën në Shtëpinë e Bardhë, kryeministrin e Suedisë, Ulf Kristersson, në përpjekje për të treguar solidaritetet për anëtarësimin e këtij vendi në NATO. Shtetet e Bashkuara po bëjnë presion për hyrjen e vendit nordik në NATO, një javë përpara samitit të aleancës.
Biden dhe kryeministri Ulf Kristersson do të “rishikojnë bashkëpunimin në rritje të sigurisë dhe do të riafirmojnë pikëpamjen e tyre se Suedia duhet t’i bashkohet NATO-s sa më shpejt të jetë e mundur”, tha Shtëpia e Bardhë në një deklaratë që njoftoi takimin.
Udhëheqësit do të diskutojnë edhe për luftën e Rusisë kundër Ukrainës, si dhe çështje që përfshijnë Kinën. Suedia dhe Finlanda fqinje i dhanë fund politikës së tyre të gjatë të mosangazhimit ushtarak pasi Rusia pushtoi Ukrainën në shkurt 2022.
Të dyja aplikuan për anëtarësim në NATO, duke kërkuar mbrojtje nën ombrellën e sigurisë së organizatës. Finlanda, e cila ndan një kufi më shumë se 1,300 kilometra me Rusinë, u bashkua me NATO-n në prill.
Por Suedia, e cila i ka shmangur aleancat ushtarake për më shumë se 200 vjet, është ndeshur me pengesa nga Turqia dhe Hungaria. NATO kërkon miratimin unanim të të gjithë anëtarëve për t’u zgjeruar.
NATO kishte shpresuar se rruga drejt anëtarësimit të Suedisë do të zbutej përpara samitit të aleancës 11-12 korrik në Vilnius, kryeqytet i Lituanisë.
Hyrja e Suedisë do të ishte një moment simbolikisht i fuqishëm dhe treguesi më i fundit se si lufta e Rusisë po i shtyn vendet t’i bashkohen aleancës. Ato shpresa janë zbehur.
Presidenti turk Rexhep Tajip Erdogan u ka rezistuar presioneve, duke akuzuar Suedinë se është shumë e butë ndaj grupeve që ajo thotë se përbëjnë një kërcënim për sigurinë, duke përfshirë organizatat militante kurde dhe njerëzit e lidhur me një përpjekje për grusht shteti të vitit 2016 në Turqi.
Javën e kaluar, Erdogan dënoi Suedinë për një protestë gjatë së cilës u dogj Kurani. Policia suedeze e lejoi protestën jashtë një xhamie në qendër të Stokholmit, duke përmendur lirinë e fjalës pasi një gjykatë anuloi ndalimin policor për një djegie të ngjashme të Kuranit.
Sekretari i Përgjithshëm i NATO-s, Jens Stoltenberg tha se do të mblidhte zyrtarë të lartë nga Turqia, Suedia dhe Finlanda të enjten për të kapërcyer kundërshtimet e Turqisë.
Edhe Hungaria gjithashtu nuk e ka ratifikuar ende ofertën e Suedisë. Qeveria e kryeministrit hungarez Viktor Orban ka pretenduar se politikanët suedezë kanë thënë “gënjeshtra flagrante” për gjendjen e demokracisë në Hungari. Ny1
