Ardi OMERI
Shumë zhurmë për asgjë, do të thoshte Shekspiri, por në realitet sot zhurma gjenerohet nga media. Në të vërtetë, “asgjë nuk ndodh po nuk është në media”, është një shprehje në metodologjinë politike globale. (cit. G.F)
Ndërkohë, mediat botërore kontrollohen nga lobe të fuqishme. Përveç se në Shqipëri, ku fillimisht media drejtohej (përgjithësisht) nga njerëz të thjeshtë të letrave, të cilët, megjithatë, sot janë transformuar ne biznesmenë dhe në “lobistë të mëdhenj”. Kjo ndodh sepse politika i shpërblen bujarisht shërbëtorët e saj. Disa oligarkë e kanë kuptuar këtë që atëherë dhe kanë filluar të blejnë median, duke u bashkuar me lobet. Sot, mediat kryesore të botës, përfshirë Shqipërinë, kontrollohen nga njerëz me interesa ekonomike dhe, tërthorazi, politike. Ekonomia kontrollon politikën.
Në të gjithë botën, grupet anti-emigracion kanë filluar të fitojnë terren dhe mediat po i kushtojnë mbulim të gjerë kësaj çështjeje të ndjeshme, e cila deri pak vite më parë ishte domen ekskluziv i së djathtës ekstreme. Një gjë nuk ndryshon kurrë për ne shqiptarët: kemi qenë në faqet e para të gazetave që nga viti 1990 dhe vazhdojmë të jemi. Nuk ka gazetë në botë që nuk boton lajme për shqiptarët. Ndonjëherë për emigracionin e paligjshëm, dhe, më së fundmi, sepse ne konsiderohemi udhëheqësit e mafies kriminale globale. Por këta “të mjerë” janë plotësisht të humbur në budallallëqet që shkruajnë. Ndërsa pretendojnë se numri më i madh i të burgosurve të huaj në burgjet evropiane janë shqiptarë, ata harrojnë se nuk janë bosët e krimit që përfundojnë në burg, por ushtarët. Shqiptarët kanë një parim se “burgu është për burrat” dhe e kanë për për të bërë disa vite në burg për të fituar para. Shqiptarët, duke dalë nga diktatura dhe të etur për “liri”, 35 vjet më parë, u nisën në aventura “pa u menduar dy herë”, rrezikojnë shumë lehtë. Kjo nuk e përjashton në asnjë mënyrë mundësinë që shumë nga “kapot” e mafies ndërkombëtare të jenë shqiptarë, por unë besoj se media, e kontrolluar nga lobe të fuqishme ekonomike dhe politike në të gjithë botën, po përpiqet të largojë vëmendjen nga mafiet e tyre. Nga interesat e tyre në fusha të ndryshme, madje edhe në ato të pista, ku ka para të mëdha e të shpejta…
Sot, në Mbretërinë e Bashkuar, flamuri antishqiptar valëvitet nga Daily Mirror, Daily Mail, Telegraph dhe kushdo tjetër që mund t’ju shkojë ndërmend, por në çdo rast, këto janë “lobbe”, kryesisht të lidhura me Partinë Reforma. Partia Reforma drejtohet nga Nigel Farage, i cili deri vonë ishte edhe kolumnist-moderator, editioralist për NGB, një media vizive. Ai u akuzua se mori 5 milionë paund nga një milioner, pa i deklaruar as në deklaratën e detyrueshme të pasurisë. një ish gazetar me plot dritë-hije, i cili kaloi në politike me qëllime gjoja pro britanike dhe drejtoi daljen e Britanisë nga Europa. Madje akuzohet edhe për slogane pro naziste, që natyrisht, ai i ka mohuar. Njëlloj siç mohon sot, pas fitores ne këshillat lokale se “do të heq council tax”, për të cilën u zotua para zgjedhjeve. Kjo forcë politike tani dominon politikën britanike. Edhe në këto zgjedhje të reja për këshillat lokale, ajo ka “tejkaluar” Partinë Laburiste dhe Konservatorët me shumë më tepër vende, dhe të mendosh se deri para disa vitesh, ishte e katërta ose e pesta në renditjen zgjedhore. Sot, është forca kryesore sepse është anti-imigracionit dhe sepse në median e kontrolluar nga lobbe të fuqishme, “varka të vogla”, të cilat ne i quajmë barka të vogla, që transportojnë emigrantë, shfaqen çdo ditë. A e dini sa emigrantë hyjnë në Mbretërinë e Bashkuar në një vit? Janë më pak se 100,000, dhe tani janë rritur pak, duke arritur në 120,000. Italia “qesh” kur dëgjon këto shifra. Spanja legalizoi 650,000 emigrantë pasi kuptoi se fuqia e saj punëtore kishte rritur ndjeshëm prodhimin vendas, aq sa në Evropë filluan ta quanin “motori evropian”, gjë që dikur ishte Gjermania. Me një rritje të PBB-së prej 2.8%, Spanja tani renditet e para në Evropë, ndërsa të tjerat janë ende në 0.5% (Italia) dhe 1.1%. Mbretëria e Bashkuar ende luhatet midis 0 dhe 1. Vendet që u kanë shpallur luftë emigrantëve kanë rritje të ulët, ndërsa ato që i kanë hapur dyert e tyre imigracionit të ligjshëm dhe të kontrolluar, duke menaxhuar mirë punën me kosto të ulët, sot gëzojnë rritje ekonomike dhe për këtë arsye mirëqenie më të madhe për qytetarët e tyre, duke përfshirë, sigurisht, ata që aspiruan për një jetë më të mirë dhe emigruan. Askush nuk zgjedh të emigrojë larg vendit të tij pa një arsye të vlefshme. Askush nuk e lë atdheun e tij, tokën e paraardhësve të tij, kujtimet e fëmijërisë së tij, pa një arsye të vlefshme. Përçmimi për këtë “arsye” nuk është vetëm i ulët dhe ksenofobi, por edhe nihilist. Në Mbretërinë e Bashkuar, prej kohësh, edhe kur shqiptarët “nuk hyjnë valle”, ata detyrohen të “kërcejnë”. Tani, thuhet se shqiptarët komandojnë edhe gomonet që mbërrijnë nga Franca në Kanalin Anglez. Bandat shqiptare thuhet se e kanë ulur çmimin në 150 paund për person. Edhe emigrantët e paligjshëm qeshin me këta “gazetarë të lirë” që shkruajnë artikuj të tillë, sepse e dinë shumë mirë se nuk kushton shumë të shkosh nga Roma në Milano, nga Brukseli në Dunkirk, nga ku nisen shumica e gomoneve dhe varkave të vogla. Këta njerëz të vegjël harrojnë se për të organizuar një grumbullim të tillë dhe një nisje kaq masive çdo natë, nuk mjafton të jesh një “mafie shqiptare”, por duhen edhe lidhje me policinë lokale dhe madje edhe policinë detare. Është e pamundur që një numër i pafund varkash të kalojnë çdo natë në të njëjtin destinacion dhe në të njëjtën rrugë pa u vënë re nga një polici e një shteti të madh e të mirë organizuar. Nëse do të pranojmë logjikën e këtyre maskarenjve mediatikë, duhet të pranojmë se shteti francez nuk ekziston. Mbretëria e madhe, qeveria, kohët e fundit ka bërë pakte të shumta me qeverinë franceze dhe madje ka ndarë fonde të konsiderueshme për policinë franceze (662 milionë pound) për të parandaluar këto gomoneve, por me sa duket korrupsioni i policisë lokale është më i madh se ai i shtetit francez. Prandaj, unë mendoj dhe besoj se këta njerëz nuk duhet ta shohin të keqen tek shqiptarët, të cilët shpesh portretizohen si armiqtë e tyre, por tek korrupsioni i tyre dhe e keqja brenda tyre. Shqiptarët nuk e shkatërrojnë dot Mbretërinë e Bashkuar, as Francën, Italinë apo ndonjë vend tjetër. Përkundrazi. Nëse shikoni të dhënat ekonomike të këtyre vendeve, veçanërisht Greqisë, Italisë, Gjermanisë, Zvicrës, Francës dhe Mbretërisë së Bashkuar, mund të shihni se (për frymë) kompanitë më të mëdha dhe më të suksesshme janë ato me pronarë shqiptarë. Punëtorët dhe bizneset më të integruar janë shqiptarët. Bazuar në këto të dhëna, le të përpiqemi të ndërtojmë ura midis komuniteteve të emigrantëve dhe komuniteteve politiko-ekonomike, jo barriera që nxisin luftë. Në fund të fundit, asnjë mafie në vetvete nuk ka një “vule” kombësie,(pasi kryejnë të njëjtat krime) por më tepër interesa politiko-ekonomike që nuk janë të lidhura me popullin, por më tepër me lobet politiko-ekonomike; prandaj është më mirë të mos ngatërrohet “kashta me grurin”…
Ardi Omeri
