Një ngjarje tragjike ka ndodhur në Veneto të Italisë, ku janë gjetur trupat e pajetë të dy personave të zhdukur, baba e bir, Leone Francesco Nardon, 65 vjeç, dhe djali i tij Francesco, 34 vjeç. Ata humbën jetën pasi makina e tyre ra në një gropë të madhe që u hap mbi një urë në Valdagno, si pasojë e reshjeve të dendura. Automjeti përfundoi në lumin Agno dhe trupat u gjetën në zonën e Trissino, në një rezervuar.
Dy viktimat ishin nisur për të ndihmuar si vullnetarë në zonën e përmbytur nga reshjet, kur ndodhi fatkeqësia. Presidenti i Rajonit të Venetos, Luca Zaia, shpalli gjendjen e emergjencës për komunat e prekura në provincat Vicenza dhe Verona. “Kjo është një tragjedi e papërshkrueshme. Këta njerëz nuk ishin kuriozë, por po shkonin të ndihmonin,” u shpreh Zaia.
Ndërkohë, në Trento, një rrëshqitje toke në lagjen San Martino çoi në evakuimin e 14 personave, për fat pa të lënduar. Po ashtu, në Valle d’Aosta, rreth 6.400 banorë mbetën pa energji elektrike për shkak të kushteve ekstreme të motit. Kompanitë janë duke punuar intensivisht, edhe me helikopterë, për të rikthyer furnizimin, sidomos në zonat më të izoluara si Cogne.
