Disa orë pas vendosjes së një bllokade detare amerikane mbi trafikun detar nga portet iraniane, Presidenti i SHBA-së Donald Trump mbajti një konferencë për shtyp jashtë Shtëpisë së Bardhë, ku foli për tensionet me Iranin dhe mundësinë e negociatave.
Trump deklaroi se Irani “do të donte shumë të arrinte një marrëveshje”, duke theksuar se një marrëveshje mbetet e mundshme nëse Teherani pranon kushtet e SHBA-së.
“Irani nuk do të ketë armë bërthamore,” u shpreh ai, duke e cilësuar këtë si një pikë kyçe mosmarrëveshjeje mes dy vendeve.
Sipas tij, palët kanë arritur dakordësi në disa çështje, por jo në atë kryesoren.
“Nëse nuk bien dakord, nuk ka marrëveshje,” shtoi Trump, duke shprehur bindjen se Irani në fund do të pranojë dialogun.
Presidenti amerikan u ndal edhe te bllokada detare, e cila sipas tij synon të kufizojë aktivitetin iranian në rajon. Ai e akuzoi Iranin se “po shantazhon botën” dhe theksoi se SHBA nuk varet nga Ngushtica e Hormuzit për furnizimet e saj me energji, pasi ka burime të brendshme nafte dhe gazi.
Trump tha gjithashtu se ka pasur kontakte nga “personat e duhur” gjatë mëngjesit, të cilët sipas tij kanë kërkuar arritjen e një marrëveshjeje për të ulur tensionet.
Në konferencë, ai u pyet edhe për deklaratat e fundit ndaj Papa Leo XIV, por refuzoi të kërkojë falje, duke e quajtur Papën “shumë të dobët në çështjet e krimit dhe të tjera”.
“Nuk kam asgjë për të kërkuar falje,” u shpreh Trump.
Presidenti amerikan theksoi gjithashtu se afati kohor për zgjidhjen e konfliktit me Iranin mbetet i pandryshuar. Ai deklaroi se aktualisht “nuk ka luftime”, por vetëm bllokadë, dhe se situata do të mbahet nën kontroll nga SHBA.
Sipas tij, trafiku detar në drejtim të Iranit është kufizuar ndjeshëm dhe Uashingtoni do të vijojë ta mbajë këtë situatë “pa ndryshime të mëdha” për momentin.
