Në një seancë të posaçme, parlamenti i Serbisë diskuton gjithçka për Kosovën.
Presidenti Aleksandër Vuçiç, prezantoi raportin e tij për dialogun Prishtinë-Beograd nga periudha 15 qershor deri më 1 shtator dhe njoftoi deputetët e qytetarët për gjendjen aktuale, sfidat që i presin, si dhe gjithçka që shteti ka bërë deri më tani për popullin serb në Kosovë.
“Dëshiroj që si betim në Kushtetutë, të them se asnjëherë, drejtpërdrejtë apo tërthorazi, nuk do ta njoh pavarësinë e Kosovës dhe as nuk do të mungoj në luftën për Kosovën”, tha Vuçiç.
Ai akuzoi Kosovën se po nxit tensione me dërgimin e forcave speciale në veri dhe paralajmëroi se rreziku i një përshkallëzimi është i afërt, i menjëhershëm dhe serioz. Madje solli në vëmendje se kapacitetet ushtarako-policore janë dhjetë herë më të forta se para dy dekadave, po ashtu edhe ato të inteligjencës. Megjithatë sqaroi se “si komandant i përgjithshëm i ushtrisë, nuk ka ndërmend t’i dërgojë fëmijët serbë në luftë”.
“Një mijë vjet negociata është më mirë se një ditë luftë. Ne nuk duhet të largohemi kurrë nga negociatat. Nëse e bëjmë këtë, ne shkatërrojmë vendin tonë”, vijoi ai.
Presidenti shtoi se lobon fuqishëm për tërheqjen e njohjeve të pavarësisë së Kosovës, duke pretenduar se ka arritur të një tjetër vend ta bëjë këtë.
“Tani kemi më shumë shtete që nuk e njohin pavarësinë e Kosovës sesa ato që e njohin.”
Vuçiç shtoi se gjithçka është vështirësuar për të dhe serbët e Kosovës që pas ardhjes në pushtet të Albin Kurtit. Presidenti nënvizoi se Serbia po përballet me një situatë të vështirë në fushën e sigurisë dhe akuzoi Prishtinën se po tenton të shkaktojë një konflikt.
Gjithashtu tha se ndërkombëtarët, bashkë me Kosovën, po tentojnë të ndryshojnë kornizën e negociatave, ndërsa lëshoi dhe një porosi për misionin e KFOR-it, duke thënë se “detyra e tyre është të mbrojnë popullatën civile dhe jo të zbatojnë vendimet e Prishtinës”.
