Presidenti i Republikës, Ilir Meta zhvilloi sot një takim me përfaqësues të shoqërisë civile për zgjedhjet e 25 prillit, ku deklaroi se, “nëse kjo shumicë konfirmohet pa prekur votën, jap dorëheqjen më 26 prill”.
“Ta kenë të qartë të gjithë, Presidenti nuk do të rrijë indiferent në këtë proces zgjedhor. Nëse kjo shumicë konfirmohet pa prekur votën, Presidenti jep dorëheqjen më 26 prill”, tha Meta.
Meta u shpreh se, “besoj se i kemi të gjitha mundësitë si popull dhe si institucione, që të paktën t’i ngjajmë Kosovës dhe Maqedonisë së Veriut, me shembullin e dhënë për organizimin e proceseve zgjedhore”.
“Duhet t’i kushtojmë shumë vëmendje informimit të zgjedhësve. Është shumë e rëndësishme t’i ndërgjegjësojmë qytetarët, se në një sistem demokratik, fuqia e tij është vetëm vota e tij”, tha ai.
“Çdo demotivim, përgjumje dhe indiferencë e qytetarëve, nuk i shërben as demokracisë dhe as vetë qytetarit, për të qenë aktiv të ndërtimin e sistemit të llogaridhënies. Çdo qytetar që nuk voton, nuk ka të drejtë të ankohet nesër për qeverinë”, theksoi Meta.
“Një pjesëmarrje masive dhe një proces shembullor zgjedhor do ishin një kontribut i madh për të tejkaluar këtë tranzicion të shumë zgjatur”, shtoi Meta.
Meta nënvizoi se, “nuk pres nga drejtësia të vijnë zgjedhjet e lira dhe të ndershme, sepse i dimë të gjithë problemet që ka sistemi i drejtësisë dhe për vetë mënyrën se si është zbatuar Reforma e Drejtësisë”.
“Nëse do kishte funksionuar Prokuroria dhe SPAK, nuk do kisha marrë iniciativat që kam nisur. Bundestagu ka vite që kërkon hetimin e krimeve zgjedhore, që ende nuk po hetohen plotësisht”, tha Meta.
“Nëse nuk erdhi ajo drejtësi që prisnim për dosjet e Shijakut dhe të Dibrës, unë jam i bindur se nga zgjedhjet e lira dhe të ndershme, do të vijë dhe do të çlirohet edhe drejtësia nga kjo kapje e jashtëzakonshme dhe trysni politike”, theksoi Kreu i Shtetit.
“Së bashku të rritim vëmendjen dhe monitorimin e të gjitha institucionet për rastet e veprave penale që prekin zgjedhjet. Të dekurajojmë çdo krim zgjedhor dhe të inkurajojmë qytetarët që votat e tyre do të mbrohet”, tha Meta në takim.
“Ka marrë fund njëherë e përgjithmonë dhe do të marrë fund indiferenca jonë përballë parimit stalinist, që nuk ka rëndësi kush voton, rëndësi ka kush numëron”, tha Meta.
“Problemet e të gjithë sistemit tonë demokratik, janë probleme të legjitimitetit të institucioneve tona. Ky problem zgjidhet më 25 prill, nëpërmjet referendumit. Të gjithë duhet të bashkohemi për t’i ndihmuar zgjedhësit që ata të mos kenë probleme në këtë proces, por të shkojnë drejt këtij procesi me garancinë e plotë se vota e tyre nuk dot të preket”, theksoi Meta.
“Mbrojtja e zgjedhjeve është një proces që ka nisur por që duhet të konsolidohet. Ky angazhim nuk duhet të jetë vetëm i institucioneve, por i të gjithë qytetarëve”, tha ai.
Meta shtoi se, “problemet e të gjithë sistemit tonë demokratik, janë probleme të legjitimitetit të institucioneve tona. Ky problem zgjidhet më 25 prill, nëpërmjet referendumit.Të gjithë duhet të bashkohemi për t’i ndihmuar zgjedhësit që ata të mos kenë probleme në këtë proces, por të shkojnë drejt këtij procesi me garancinë e plotë se vota e tyre nuk dot të preket”.
Ai nënvizoi se, “mbrojtja e zgjedhjeve është një proces që ka nisur, por që duhet të konsolidohet. Ky angazhim nuk duhet të jetë vetëm i institucioneve, por i të gjithë qytetarëve”.
“Presidenti është i detyruar të përdorë një retorikë tjetër, për të ndaluar të gjithë ata që intimidojnë qytetarët dhe që duan të vrasin besimin tek vota e lirë. Nëse do kishte funksionuar Prokuroria dhe do ishin hetuar krimet zgjedhore, për të cilat ka kërkuar hetim edhe Bundestagu, atëherë unë do të kisha një retorikë tjetër”, tha Meta.
Meta theksoi se, “shumicë të përhershme ka vetëm në diktaturë. Ju jeni të vetëdijshëm për përpjekjet e papranueshme të Qeverisë për të intimiduar qytetarët”.
“Ta kenë të qartë të gjithë, Presidenti nuk do të rrijë indiferent në këtë proces zgjedhor. Nëse kjo shumicë konfirmohet pa prekur votën, Presidenti jep dorëheqjen më 26 prill”, tha Meta.
“Të jenë të qartë të gjithë, Presidenti do të shkojë në të gjithë Shqipërinë me këto mesazhe: Qytetarët duhet të ndërgjegjësohen se në demokraci, fuqia e tyre është vota. Ta përdorin votën për të zgjedhur dhe për të ndëshkuar. Ta orientojnë votën e tyre tek kandidatët më me integritet. Për mua ka rëndësi të ringjallet besimi tek demokracia”, u shpreh Meta.
“Presidenti nuk do të fshihet kurrë nga një sfidë e madhe, angazhimi për të ndalur çdo përpjekje që synon të vrasë demokracinë. Presidenti është i gatshëm të japë llogari për të gjitha veprimet dhe aktet e Tij”, tha Meta, duke kërkuar që “t’i kthejmë zgjedhjet në një festë të demokracisë”.
“Vota duhet të jetë njëherë e përgjithmonë e shenjtë dhe e barabartë. Ne do t’i mbështesim të gjitha institucionet të bëjnë detyrën në këtë drejtim, përfshi edhe SPAK-un. Por me “cironkat” e dosjes së Dibrës dhe Shijakut nuk trembet asnjë nga ata që kanë ndërmend të venë dorë mbi procesin zgjedhor”, theksoi Meta.
“Ju bëj thirrje të gjithë qytetarëve, të votojnë në listën e kandidatëve për deputet, personat më me vlera qytetare, më me integritet dhe më të përkushtuar ndaj komunitetit, që ata besojnë, për t’ju dhënë një mesazh në këtë mënyrë edhe kryetarëve të forcave politike”, tha Meta.
Ish-kryetari i KQZ-së, Kristaq Kume tha se ky proces do të jetë një test tepër i rëndësishëm për demokracinë, ndaj të gjithë duhet të angazhohemi për të mbrojtur demokracinë në vendin tonë.
“Pres që një pjesë e mirë e fenomeneve që atakonin standardet e zgjedhjeve, nuk do të shfaqen, si rezultat i ndryshimit ligjor të realizuar dhe angazhimit tonë të përbashkët”, tha ai.
Analisti Afrim Krasniqi tha se, “në 25 prill Shqipëria nuk po shkon në luftë, por në zgjedhjet dhe zgjedhjet janë praktikë normale dhe duhet të jetë rutinë”.
“Një nxitje e uljes së retorikës politike dhe fokusimi te ofertat konkrete për qytetarët, për krizën ekonomike dhe e ofertës së si do të jetë Shqipëria e dekadës së ardhshme”.
“Në zgjedhje nuk votohen institucionet por partitë dhe kandidatët”, tha ai, duke shtuar se, “unë do doja si qytetar i këtij vendi që Institucioni i Presidentit t’i rikthehet dhe t’i përshtatet kostumit kushtetuese dhe solemnitetit që kërkohet nga institucioni i kryetarit të shtetit. Disa prej akteve dhe retorikave mund të evitoheshin. Nuk po shkojmë në një situatë të konfliktit të madh, por në një situatë që mund të ndryshojë me vullnet dhe me pjesëmarrjen e madhe të qytetarëve”./atsh/
