Kryetari i Partisë Demokratike, Lulzim Basha, ishte sot në një fermë të vogël në Marikaj, Vorë, ku deklaroi se “e vetmja arsye e mungesës së tregut, është rritja e fukarallëkut tek njerëzit dhe rënia e fuqisë blerëse”.
Zgjidhja e vetme, sipas tij, është ndryshimi që do vijë më 25 prill, ku qeveria do të jetë në krahun e çdo fermeri shqiptar.
Basha tha se “në planin e qeverisë së ardhshme, 100 milionë euro do të shkojnë për subvencione, për fermerët”.
“Ekonomia është tërësisht e shkatërruar. Kështu që dua t’i them të gjithë grave punëtore në veçanti në fshat, nga gocat e reja deri te nënat si ty, që ne do bëjmë gjithçka që ekonomia të vihet në lëvizje e njerëzit të kenë para për të blerë këto prodhime të mrekullueshme. Në 25 prill është data dhe të gjitha këto prodhime të mrekullueshme ne do garantojmë që të shkojnë në treg dhe njerëzit të kenë lekë për t’i blerë”, tha Basha.
Ai theksoi se, “kjo është një nga gjërat kryesore që do të ndryshojmë me fshatin, se ne fshatin e kemi prioritet të planit tonë dhe 100 milionë euro në vit do t’i ndajmë për subvencione. Në bazë të prodhimit që bën do merrni para nga shteti për të paguar të gjitha këto që thua ti, fidanët, plehrat etj. Do t’i ndihmojmë të gjithë njerëzit punëtorë të këtij vendi e në veçanti nënat punëtore si ty. Siç po largohet dimri, do të largojmë edhe të keqen më 25 prill”.