Kreu i Partisë Demokratike, Lulzim Basha ka reaguar me anë të një postimi në facebook pas mesazhit të kryeministrit Rama drejtuar komisionerëve të BE-së.
Lulzim Basha ishte sot paradite në një takim online me Komisioneren e BE Mariya Gabriel dhe përfaqësues të Universitetit Modul të Vjenës, ku në fokus të diskutimeve ishte arsimi, prezantoi platformën e arsimit online.
Kjo tërhoqi vëmendjen e kryeministrit Edi Rama i cili nuk la pa sulmuar komisionerët e BE-së.
Basha shprehet se Rama nuk bëri asgjë për ta afruar integrimin, por ai bëri hapa prapa dhe është i vendosur të bëjë gjithçka për të ecur përpara me integrimin europian.
“I habitshëm nervozizmi i Rames. Unë, PD dhe shqiptarët e kemi përcaktuar rrugën tonë që në dhjetorin ‘90: ajo është rruga që të çon në Europë.
Sot të gjithë e kuptojnë se pa u afruar me BE, Shqipëria nuk do të mund të bëjë përpara.
Për 8 vjet, jo vetëm që Rama nuk bëri asgjë për ta afruar integrimin, por ai bëri hapa prapa. Unë jam i vendosur të bëj gjithçka për të ecur përpara me integrimin europian, për të sjellë ndryshimin e vërtetë, arsim cilësor dhe punësim dinjitoz për shqiptarët këtu në Shqipëri.
Mirënjohje BE, KE për ndihmë e pakursyer që i kanë dhënë dhe do ti japin vendit tonë.”
“Dikush në Bruksel duhet t’u thotë komisionerëve që harxhojnë kohën e punës së paguar nga taksat e popujve të Europës, për të bërë videomuhabete elektorale me Lulëzim Bashën, se kjo quhet ndërhyrje në fushatën e brendshme elektorale të një vendi kandidat për në BE!,” thuhej në mesazhin e Ramës drejtuar Brukselit.
