Në nder të deputetit të Partisë Socialiste, Bashkim Fino, i cili humbi betejën me COVID-19, kanë nisur homazhet në Pallatin e Kongreseve, ndërkohë që dita e sotme është shpallur ditë zie kombëtare.
Homazhet u organizuan nga Kryesia e Kuvendit dhe nisën rreth orës 12:00 për të vijuar deri në orën 16:00.
Zyrtarët më të lartë të shtetit, deputetë, miq e qytetarë të shumtë zhvilluan homazhe për Bashkim Finon, Kryeministër i Qeverisë së Pajtimit Kombëtar, deputet dhe politikan i shquar.
Presidenti Ilir Meta tha pas homazheve se “Bashkim Fino ishte një nga miqtë e mi më të mirë dhe do të mbetet sepse në një moshë shumë të re ai u bë bë një figurë frymëzuese për ne më të rinjtë në atë kohë si kryetar i Bashkisë së Gjirokastrës, një punë që e bëri më shumë sukses dhe ajo ishte edhe baza e përzgjedhjes së tij mes shumë e shumë kandidaturave në atë vit të çmëndur të Shqipërisë, në ’97 për të krijuar një qeveri të Pajtimit dhe Stabilitetit, detyrë që ai e bëri në mënyrë të jashtëzakonshme pasi e dimë të gjithë sa i ndarë dhe i polarizuar ishte vendi”.
“Unë kam edhe shumë kujtime të veçanta me të sepse ai ishte një përkrahës i të rinjve. Gjithashtu ai ishte edhe një figurë tepër sportive shumë i dhënë pas sportit dhe kjo na bashkonte. Ishte shumë njerëzor bujar dhe zemërgjerë, tolerant dhe dinte të dallonte dallimet politike nga raportet njerëzore dhe shoqërore. Momenti i sotëm ishte moment shokues i ndarjes papritur nga jeta edhe pse kishte pasur disa sfida që kishte kaluar me shëndetin”, tha Meta.
Edhe Kryeministri Edi Rama, i shoqëruar nga bashkëshortja e tij, Linda Rama morën pjesë në homazhet që po zhvillohen në Pallatin e Kongreseve, për ndarjen nga jeta të deputetit socialist, Bashkim Fino.
Kryetari i Kuvendit, Gramoz Ruçi zhvilloi homazhe për Bashkim Finon. Në një prononcim për medie, Ruçi tha se “sot u nda nga jeta një njeri me zemër të madh dhe me kontribute për vendin”.
“Do ta kujtoja si një njeri zemërmadh edhe me kontribut po aq të madh politik, që fatkeqësisht zemra e tij nuk e përballoi dot dhe e la. Do të na mungojë shumë, mezi e prisja të na bashkohej në ekipin e Fierit, por ja që nuk ishte e thënë, lamtumirë i dashur”, tha Ruçi.
Homazhe në nderim të Bashim Finos zhvilloi sto edhe kryetari i PD-së, Lulzim Basha, i shoqëruar nga bashkëshortja e tij Aurela Hoxha.
Ndërsa kryetari i grupit parlamentar të PS-së, Taulant Balla, pas homazheve në Pallatin e Kongreseve, tha se “PS humbi sot një mik dhe një njeri të veçantë”.
“PS humbi sot një mik dhe një njeri të veçantë, i cili në 26 vitet e fundit ka qenë model dhe me kontribut në këtë parti. Fjalët për të sot janë të pakta, ajo që do na mungojë është një këshillë e një miku të veçantë, por sigurisht ka dhe beteja që nuk fitohen, edhe pse arriti të kalonte pjesërisht betejën me COVID nuk arriti ta çonte deri në fund”, tha Balla.
Deputeti socialist, Bashkim Fino humbi jetën sot në moshën 58-vjeçare, pasi ishte i prekur nga koronavirusi. Në nderim të kujtimit të Bashkim Finos, të gjitha partitë politike kanë ndërprerë fushatën elektorale.
Pas homazheve, ai do të përcillet sot për në orën 16:00 në varrezat e Sharrës./ATSH/
