Kryeministri Zoran Zaev edhe sot iu kërkoi qytetarëve të jenë të qetë, duke i siguruar se gjuha dhe identiteti maqedonas nuk janë në tavolinën e negociatave me Bullgarinë. Zaev i bëri thirrje opozitës të jetë serioze, pas akuzave të saja se Qeveria po zhvillon negociata të fshehta me Sofjen dhe se po përgatitet ta pranojë Deklaratën e Parlamentit Bullgar, në dëm të interesave kombëtare.
“Nuk fshehim asgjë, e as që diskutohet ose negociohet doiçka më ndryshe. Në tavolinë është propozimi Portugez. Ne thamë që për ne është bazë e mirë mbi të cilën mund të gjendet zgjidhja … Ja, afër është data 22, do dihet se çfarë u diskutua, është për 18 ditë nga sot … “, tha Zoran Zaev, kryeministër.
Zaev tha se Ministria e Jashtme e Maqedonisë së Veriut dhe ajo e Bullgarisë po punojnë në përmbajtjen e Udhërrëfyes për përmbushjen e detyrimeve të Marrëveshjes së Fqinjësisë së Mirë të vitit 2017. Por, VMRO-DPMNE edhe sot vazhdoi me akuzat se Zaevit nuk mund t’i besohet.
“Zoran Zaev fillimisht tha se Bullgaria hodhi poshtë propozimin Portugez, ndërsa tani thotë se i njëjti është në tavolinë … Zaev rënoi të gjitha pozitat e shtetit. Kur ai negocion me Bullgarinë, Maqedonia nis nga minusi dhe e dimë se Zaev nënshkruan gjithçka, por ka frikë nga populli dhe prandaj ai bën deklarata të ndryshme në kohë të ndryshme.”, thonë nga VMRO-DPMNE.
Përndryshe, Qeveria e Shkupit e vlerësoi propozimin portugez si një bazë të mirë për zgjidhje, por Sofja nuk mendon kështu dhe këmbëngul në garanci të qarta se Maqedonia e Veriut do t’i përmbushë të gjitha detyrimet nga marrëveshja dypalëshe. Më 22 qershor duhet të mbahet Këshilli i çështjeve të përgjithshme i BE-së, por nuk ka sinjale të qarta se Sofja do ta miratojë shpejtë kornizën negociuese për vendin./Alsat/
