Egjipti lëshoi të mërkurën për qarkullim “Ever Given”, një anije masive kontejnerësh që kishte bllokuar Kanalin e Suezit në fillim të këtij viti, pasi autoritetet e rrugëve ujore dhe pronarët japonezë të anijes arritën një marrëveshje.
Sipas mediave të huaja, lirimi i supertankerit përfundon një qëndrim më shumë se tre muaj, pasi anija u konfiskua për një kërkesë kompensimi të bërë nga Autoriteti i Kanalit të Suezit (SCA).
Anija me flamur Panamaje u zhvendos më 29 mars, gjashtë ditë pasi u përplas gjatë një stuhie rëre dhe bllokoi kanalin, duke bllokuar trafikun në një nga rrugët më të ngarkuara të transportit dhe duke shkaktuar efekte në të gjithë botën.
Anija me gjatësi 400 metra më vonë u ankorua në zonën e Liqeneve të Mëdha, një pjesë më e gjerë e kanalit.
Dhe të mërkurën, përfaqësuesit ligjorë të SCA dhe pronarët e mega-anijes nënshkruan një marrëveshje kompensimi jashtë gjykatës me një vlerë të pazbuluar gjatë një ceremonie televizive.
Kreu i SCA, Osama Rabae, tha në ceremoni se marrëveshja përmbushi interesat e të dy palëve, duke mbyllur negociatat tre-mujore.
Pas nënshkrimit të marrëveshjes, Ever Given u pa të lundronte nga Kanali i Suezit dhe media egjiptiane njoftoi se do të drejtohej për në Roterdam në Holandë.
Ndërkohë avokati i SCA-së, Khalid Abu Bakr tha se autoriteti ishte i përkushtuar në fshehtësinë e marrëveshjes me pronarin e mega-anijes.
Ndryshe, SCA fillimisht kërkoi 950 milionë dollarë kompensim, para se të ulte kërkesën në 550 milionë, sipas mediave egjiptiane.
