Filmi “Vera Andrron Detin” do të jetë pjesë e festivalit “Venice film Festival”, në Venecia. Në qendër të filmit vihet Vera, një grua që lufton mbi pabarazitë gjinore, ndërsa për historinë intriguese filmi është nominuar në disa kategori. Festivali i Venecias rikthehet këtë edicion të 78 për të përqafuar artin e mirë.
Filmi “Vera Andrron Detin” do të jepet në premierën botërore të festivalit prestigjioz të filmit në Venecia “Venice Film Festival”. Filmi është nominuar në disa kategori atë të “Filmit më të mirë”, “Regjisë më të mirë”, “Aktori dhe aktorja më e mirë”, “Çmimin special të jurisë”.
Filmi ka një histroi tepër intriguese. Përditshmëria e Verës merr një rrjedhë tjetër, kur bashkëshorti i saj vetëvritet, nga aty lindin kërcënimet e njëpasnjëshme të kushërinjëve, që pretendojnë se kanë pronësi mbi shtëpinë e tyre në fshat.
Vera kalon nëpër rreziqe të tëra, aq sa detyrohet të marrë fatin e gjithë familjes në dorë.
Filmi “Vera Andrron Detin” është një portret sa intim, aq edhe universal i një gruaje, e cila lufton fortë ndaj pabarazimeve gjinore.
Filmi është bashkëprodhim mes Kosovës (Puntoria Kreative Isstra, Vera Films), Maqedonisë së Veriut (Dream Factory) dhe Shqipërisë (Papadhimitri Production) në mbështetjen e Qendrës Kinematografike të Kosovës, Agjencisë së Filmit të Maqedonisë së Veriut dhe Qendrës Kombëtare e Kinematografisë.
Edhe pse rreziku nga pandemia Covid 19 vazhdon të jetë i pranishëm, Festivali i Venecias në edicionin e 78 rikthehet për të përmbushur shijet estetike të publikut përmes artit të mirë.
