Sipas Odës Tregtare Britanike, mijëra kompani tashmë kanë hartuar plane emergjente për t’u përballur me largimin u mundshëm pa marrëveshje të Britanisë së Madhe nga Bashkimi Evropian.
Shumë prej tyre po i përshpejtojnë aksionet për ta zhvendosur veprimtarinë jashtë vendit.
Para një jave të rëndësishme për kuvendin, gjatë së cilës deputetët do të përpiqen t’ia marrin kontrollin nga duart kryeministres May për ta shtyrë Brexit-in dhe për ta shmangur largimin pa marrëveshje, kompanitë tashmë kanë bërë hapa konkretë për t’u përgatitur për këtë situatë. Vetëm gjatë ditëve të fundit, rreth 35 kompani i kanë aktivizuar planet për t’u zhvendosur jashtë Britanisë së Madhe ose janë duke mbledhur mallra për t’i luftuar efektet e këqija të këtij procesi politik.
Javën e kaluar, disa nga punëdhënësit më të mëdhenj të Mbretërisë së Bashkuar, përfshirë kompaninë “Airbus”, e cila i ka 14 mijë të punësuar në këtë shtet, paralajmëroi për efektet e mundshme shkatërruese të ndarjes së vendit nga BE-ja pa marrëveshje.
Që nga dalja e rezultateve të referendumit të mbajtur në vitin 2016, grupet e biznesit dhe Federata Britanike e Industrisë ua kanë bërë me dije ministrave britanikë se eksportuesit kanë nevojë për qasje në unionin e doganave të BE-së, i cili lejon importimin e mallrave pa taksa. Megjithatë, May ka këmbëngulur që Britania e Madhe duhet të largohet nga unioni i doganave dhe tregu i përbashkët i BE-së në mënyrë që të respektohen plotësisht rezultatet e referendumit, shkruan “The Guardian”.
