Kryetari i grupit parlamentar të Partisë Socialiste, Taulant Balla u shpreh sot se “nuk ka asnjë dyshim se Konferenca e Parë Ndërqeveritare me Bashkimin Europian do të brenda këtij viti”.
Në një prononcim për medie nga selia e Kuvendit, Balla informoi mbi mbledhjen e Konferencës së Kryetarëve dhe prioritetet e punës së Kuvendit në nisje të këtij sesioni parlamentar.
“Dëshira ime dhe e kryetarëve të grupeve të tjera parlamentare është që puna të vijojë normalisht që të përmbushim të gjitha detyrimit që Kuvendi ka në këtë moment të rëndësishëm”, tha Balla.
Ai shprehu bindjen se viti 2022, është një vit i rëndësishëm për anëtarësimin e Shqipërisë në Bashkimin Evropian.
“Nuk ka asnjë dyshim që përgjatë këtij viti ne do të kemi mundësi të mbahet Konferenca e Parë Ndërqeveritare edhe pse ende për fat të keq lajmet që vijnë nga Sofja apo nga Shkupi nuk janë lajme të zhbllokimit të një mosmarrëveshje mes dy vendeve. Por unë mendoj se ka ardhur koha që Shqipëria ta mbajë domosdoshmërisht Konferencën e parë Ndërqeveritare me BE-në”, tha Balla.
Në këtë aspekt, Balla tha se “nuk ka asnjë pengesë”. “Pritshmëria e të gjithë partnerëve, si BE dhe SHBA, është që ne, në frymën e një përgjegjësie të madhe ndaj fateve të vendit, ta përmbyllim në javët e para të këtij sesioni detyrën e Kuvendit për të zgjatur afatet e institucioneve të Vetingut”, tha Balla.
Të mos harrojmë, vijoi ai, “që përmbyllja e procesit të Vettingut me të njëjtat institucione që ka deri tani është diçka që nuk ka të bëjë me agjendën politike të asnjë force në vend, por ka të bëjë me agjendën e rëndësishme të rrugës evropiane të Shqipërisë”./ATSH/
