Ndërsa përpjekjet diplomatike për të zbutur tensionet rreth Ukrainës vazhdojnë, imazhet satelitore tregojnë dislokime të reja në terren të pajisjeve të blinduara dhe trupave nga garnizonet ruse në atë që një analist thotë se mund të tregojë një rritje të gatishmërisë ushtarake.
Kompania amerikane Maxar Technologies, e cila ka monitoruar ngritjen ushtarake të Rusisë përgjatë kufirit me Ukrainën për javë të tëra, ka publikuar imazhe të reja që sugjerojnë disa lëvizje të mëdha të grupeve të betejës rreth garnizonit ushtarak në Soloti, Rusi, që nga 13 shkurti.
Imazhet e publikuara të dielën, tregonin se shumica e njësive luftarake dhe pajisjeve mbështetëse në Soloti ishin larguar.
Por gjurmët e gjera të automjeteve dhe disa kolona me pajisje të blinduara u panë në të gjithë zonën, tha kompania.
“Ky aktivitet i ri paraqet një ndryshim në modelin e dislokimeve të vëzhguara më parë të grupeve luftarake [tanke, transportues të personelit të blinduar, artileri dhe pajisje mbështetëse]”, tha Maxar në një njoftim.
Disa pajisje janë vendosur gjithashtu në lindje të Valuyki aty pranë, Rusi, në një fushë afërsisht 15 km (9 milje) në veri të kufirit ukrainas.
Një numër i dislokimeve të reja në terren janë parë gjithashtu në veriperëndim të qytetit rus të Belgorodit, tha Maxar.
Bazuar në gjurmët dhe borën, aktiviteti dukej se ishte i fundit, tha Stephen Wood, drejtor i lartë në Maxar News Bureau, për agjencinë e lajmeve Reuters.
“Për mua, kjo tregon një gjendje gatishmërie të shtuar,” tha ai.
