Nisja e pushtimit rus ndaj Ukrainës kapërceu me disa kapituj debatin në parlamentin shqiptar duke marrë një vëmendje të veçantë në nisje të punimeve në seancën plenare, ndonëse politika shqiptare tregoi se edhe në këtë rast nuk ishte në gjendje të kapërcente ndarjet e brendshme.
“Jemi përpara një agresioni të marrë, të çmendur që padyshim rrezikon rajonin tonë”, tha Tritan Shehu. “Shqipëria është vend i NATO-s dhe merr vendim tjetër kund për këtë gjë”, deklaroi Mimi Kodheli.
Ky zhvillim në nisje të punimeve të Parlamentit nuk e zbehu shqetësimin për atë se çfarë po ndodh në lindje të kontinentit. Ish-kryeministri Sali Berisha guxoi të thoshte në sallën e Parlamentit se jemi përpara një lufte që askush nuk e dëshironte duke ngritur akuza ndaj qeverisë shqiptare për mos reagim të vendosur. “Fundi i paqes në kontinentin tonë dhe “de facto” fillimi i luftës së tretë botërore. Dënoj qëndrimin kapitullant të këtij parlamenti vasal të Rusisë së vogël, Serbisë. vdekje pushtuesve rusë”, tha Berisha.
Ministrja e Jashtme, Olta Xhaçka dënoi me zë dhe figurë veprimet ushtarake të Rusisë, por iu kundërpërgjigj edhe akuzave të Berishës. “Është e papranueshme, dhe e pakuptueshme këto sulme dhe kjo baltë për histori me komplote. Po i shitet Ballkani Serbisë, në mos Serbisë po i shitet Rusisë, po tradhtohet Kosova, këto janë absolutisht të pakuptimta dhe absurde. Është me rëndësi vendimtare për ti mos dhënë aktorëve të tretë rol destabilizues në rajonin tonë”.
Qëndrimin më të moderuar nga opozita e kishte kryetari i PD-së Lulzim Basha, i cili kërkoi angazhim të qeverisë për të ndihmuar autoritet ukrainase, brenda mundësive të shtetit shqiptar, por pa përmendur rezolutën e kërkuar nga grupi Berisha. “Në mënyrë paekuivoke i bëj thirrje autoriteteve shqiptare, jo vetëm për bashkëveprimin e plotë diplomatik në këshillin e sigurisë, në NATO, por çdo masë tjetër për t’iu gjetur pranë autoriteteve dhe qytetarëve ukrainas brenda mundësive tona”, tha Basha.
