Britania tha se po dërgon një sistem raketash antiajrore së bashku me 100 pjesëtarë të personelit ushtarak në Poloni për të mbrojtur hapësirën e saj ajrore kundër çdo agresioni rus.
Duke folur në Varshavë, Sekretari i Mbrojtjes Ben Wallace tha se Polonia po mban një barrë të madhe të luftës midis Rusisë dhe Ukrainës.
“Ne do të vendosim në Poloni sistemin e raketave antiajrore me rreze të mesme Sky Saber me rreth 100 pjesëtarë të personelit për t’u siguruar që të qëndrojmë përkrah Polonisë, duke mbrojtur hapësirën e saj ajrore nga çdo agresion i mëtejshëm nga Rusia”, tha Wallace.
Marrëveshja për stacionimin e sistemit u vulos gjatë takimit të sekretarit Wallace me homologun polak Mariusz Blaszczak, thuhet në një deklaratë të qeverisë.
“Ne duam të sigurojmë që kufijtë e Evropës të mbrohen mirë”, tha një zëdhënës i kryeministrit britanik Boris Johnson.
Sistemi i mbrojtjes ajrore Sky Saber mund të përdoret kundër avionëve luftarakë ose bombave inteligjente.
Fundjavën e kaluar raketat ruse sulmuan një bazë stërvitore ushtarake ukrainase 15 milje nga kufiri polako-ukrainas, duke vrarë 35 persona.
