Duken si pamje nga portat e ferrit. Të vrarët qëndrojnë përgjatë autostradës perëndimore të Kievit, disa pranë automjeteve të tyre të shkatërruara, teksa qentë pastrojnë mbetjet. Kjo është ajo që forcat ruse lanë pas kur u tërhoqën nga këtu.
Aleksandr Radzikovsky na tregon se këta ishin civilë, të qëlluar nga ky pozicion, kur rusët kishin vendosur një tank: “Mund ta shikoni që kjo është si një zonë qitjeje. Makinat janë në rresht dhe ato të tjerat pak a shumë. Këtu nuk ka automjete, pasi nuk i lejuan të kalonin. Qëllonin sapo afroheshin”.
Qeveria ruse mohon shënjestrimin e civilëve. Akuzat dhe pretendimet i konsideron false dhe propagandë. Por, Radzikovsky është pjesë e një njësie dronësh dhe filmuan një incident. Ishte 7 marsi, kur rusët kishin ende kontrollin e plotë të kësaj zone. Një grup makinash po ecnin në autostradë. Ata u kthyen pasi ndaj tyre u hap zjarr nga një tank. Automjeti ndalon dhe shoferi del jashtë, më pas ndodh kjo: “Ai ngriti duart dhe i vendosi në kokë dhe më pas u qëllua në këtë vend”.
Dy njerëz u vranë atë ditë: Maksim Iovenko dhe bashkëshortja e tij, Ksenia. Familja konfirmoi idenditetin për CNN. Pas incidentit, droni filmoi trupat ruse që nxorën dy persona nga makina dhe i morën me vete. Djali 6-vjeçar dhe një mik i familjes që po udhëtonte me ta, konfirmojnë të afërmit. Të dy ishin lënë të lirë nga rusët. Ushtarët kontrolluan trupin e Maksimit dhe e larguan tutje. Kjo ngjarje e traumatizoi dhe motivoi njësinë e dronëve të Ukrainës.
“Në jetën normale përpara luftës, ne ishim civilë që fluturonin dronët dhe bënim video për YouTube. Tani ne jemi bërë pjesë e rëndësishme e rezistencës”, thotë Radzikovsky.
Ai na dërgoi xhirime me orë të tëra që zbulonin vendqëndrimet e rusëve, madje edhe në zona ku dukej e pamundur të dalloheshin. Kjo ndihmoi ukrainasit t’i godisnin: “Ata na quajnë “sytë”, pasi ne jemi sytë që u mundësojnë atyre të shohin dhe nëse mund të shohin dhe raportojnë mund të kryejnë dhe sulme me artileri”.
Ai thotë se informacione i përçohet inteligjencës brenda pak minutave. Ndonjëherë, një mushkonjë e vogël mund të eleminojë një tufë elefantësh. Këto janë pamje me dron të njësisë së Radzikovskit që shfaqin një autokolonë masive tankesh dhe autoblindash ruse. Këtu është i njëjti vend pasi dronët i pikasën. Radzikovsky na thotë se njësia luajti një rol të madh në shtyrjen pas të trupave ruse, me ukrainasit që kishin më pak armë: “Ne jemi të shkathët si një mbrojtje territoriale, mund të themi se kjo është vetëvrasje dhe lëvizim. Por, ushtria duhet të qëndrojë, ata janë të urdhëruar të qëndrojnë dhe ata qëndrojnë. Ata vdesin, teksa qëndrojnë për ta ruajtur këtë tokë”.
Askush nuk e di se sa rusë vdiqën këtu, por njësia thotë se janë shumë të vrarë me ndihmën e dronëve amatorë, në përpjekje për të mbrojtur atdheun.
