Pas tërmetit që goditi Bosnjen mbrëmjen e djeshme në orën 23:07, aparatet e Qendrës për Sizmologji të Institutit Federal Hidrometeorologjik kanë regjistruar një sërë pasgoditje në orët në vijim.
“Pas tërmetit të parë 5.6 ballë, lëkundjet e më tejshme ishin të pritshmet. Ne i monitorojmë, i regjistrojmë dhe i përpunojmë të dhënat gjatë gjithë natës dhe mund të them se ishin 12 të tilla dhe e fundit ka ndodhur mëngjesin e sotëm në orën 8.20”, tha Merjema Genjac, eksperte për sizmologjinë në FHMZ.
Genjac shton se priten tërmete më të forta në BeH, sepse numri i dukurive të tilla ka qenë nën mesataren për një kohë të gjatë, kështu që energjia është akumuluar.
“Njëra prej tyre kalon nga Banja Luka dhe Petrinja dhe mund të themi se një pjesë e asaj energjie lirohet në zonën e Petrinjës. Ne e kemi këtë pjesë hercegovinase, por na ka mbetur kjo pjesë qendrore, e cila kalon nëpër Jajce, Zenicë dhe vende të tjera, kështu që nuk mund të themi se e gjithë energjia në BeH është lëshuar. Së shpejti do të bëjmë një analizë për të parë se sa energji është liruar nga këta, për momentin, 13 tërmete në Hercegovinë dhe ka mundësi që të ketë edhe më shumë”, tha ajo.
Ajo kujton se tërmetet, forca e tyre dhe zona ku do të ndodhin, është e pamundur të parashikohen.
“Përdoruesit e telefonave Android kanë marrë një mesazh mbrëmë, por po flasim për njoftimin e tërmetit në vetëm pak çaste. Pajisja jonë transmeton valë elektromagnetike dhe ai sinjal na erdhi më shpejt se vetë vala. Jemi duke punuar në këto aplikacione në disa institute”, pohon ajo për mediat vendase.
