Shqipëria mbulon 95% të nevojave të vendit për qumështin. Këtë shifër dha ministrja e Bujqësisë Frida Krifca pas mbledhjes së qeverisë kur u pyet nga gazetarët se shoqatat e përpunuesve kanë ngritur alarmin për rrezikun e falimentimit të fabrikave të qumështit. Sipas Krifcës, rritja e çmimit të qumështit ndihmon fermerët.
“Për blegtori ne aktualisht plotësojmë 95% të nevojave të vendit për qumësht. Nevojat e vendit i plotësojmë. Sot kemi fabrika përpunimi që kanë standarde për përpunimin e qumështit me produkte cilësore që mund edhe të eksportohen. Çmimi i fermerëve është rritur dhe ata kanë mundësi të rekuperojnë kostot dhe një mirëqenie më të mirë. Për fermerët është lajm i mirë që çmimi është rritur. Sot bujqësia ka 10 milionë euro më shumë se viti i kaluar dhe këto janë shifra të patjetërsueshme. Nuk kam dijeni që fabrikat janë në rrezik”.
Krifca njoftoi gjithashtu edhe një vendim qeverie në lidhje me peshkimin që ka të bëjë me respektimin e niveleve biologjike të deteve dhe liqeneve.
“Bujqësia ka miratuar një vendim për peshkimin Për të ruajtur nivelet peshkore e deteve dhe liqeneve tona. Flota e peshkimit të respektojë masat biologjike të kërkuara. Është një vendim në përputhje me politikën europiane të peshkimit për të zvogëluar zëniet e padëshiruara dhe për eliminuar mbeturinat për një status më të mirë të peshkimit. Peshkimi është sektor i rëndësishëm edhe për eksportet. Ne do ta mbështesim edhe me një kuadër ligjor që i përafron me BE dhe ruan mjedisin dhe sistemet tona biologjike që të kemi ta shfrytëzojmë këtë pasuri në përputhje me zhvillimin dhe rendimentin e flotës sonë”.
Po kështu ministrja foli edhe për urdhrin e përvitshëm për të mos peshkuar krapin në këtë periudhë pasi fazën e shumimit.
“Urdhër për ruajtjen e niveleve të zënies së krapit, një urdhër i përvitshëm për të mos peshkuar në liqene ku krapi tani ka periudhën e shumimit”.
