Presidenti i Sri Lankës, Gotajaba Raxhapaksa është larguar nga vendi mëngjesin e kësaj të mërkurë me një avion ushtarak, pas protestave masive popullore mbi krizën ekonomike, qe e detyruan atë të japë dorëheqjen. 73 vjeçari ka mbërritur në Maldive me bashkëshorten e tij dhe dy zyrtare të lartë të sigurisë.
Protestat për mbi 1 muaj i dhanë fund dinastisë së familjes presidenciale, që drejtoi Sri Lankën për dekada të tëra. Sipas mediave, Raxhapaksa nuk do të qëndrojë në Maldive dhe synon të largohet përfundimisht drejt një vendi të tretë.
Bashkë me ish-presidentin, nga vendi është larguar drejt SHBA, edhe vëllai i tij, ish-ministër i Financave, Basil Raxhapaksa.
Qytetarët e Sri Lankës kanë akuzuar dhe fajësuar administratën e ish presidentit Raxhapaksa për krizën më të keqe ekonomike në dekada. Për muaj të tërë, ata u përballën me ndërprerje të vazhdueshme të energjisë elektrike si dhe me mungesa në të mirat bazike, ushqim, karburant e medikamente.
Presidenti nuk ishte shfaqur në publik që prej 8 korrikut dhe parlamenti pritet të mblidhet me datë 20, për të votuar pasuesin e tij në krye të shtetit.
