24 gushti shënon 31-vjetorin e pavarësisë së Ukrainës nga sundimi sovjetik, por që vendin këtë vit e gjen në luftë.
Presidenti Zelensky ftoi qytetarët ukrainas që të mos e lejojnë Moskën të mbjellë dëshpërim e frikë në këtë ditë feste.
Në samitin online të quajtur “Platforma e Krimesë”, një ditë më parë, ku merrnin pjesë 50 liderë nga e gjithë bota, presidenti Zelensky u zotua se do të marrë pas edhe Krimean nga rusët, me çdo mënyrë e mjet. Sipas tij, lufta e sotme në Ukrainë, i ka pikërisht rrënjët në konfliktin në Krime, për të cilin reagimi ndërkombëtar ishte shumë i dobët.
Ndërkohë, 24 gushti shënon edhe 6-mujorin e nisjes se pushtimit rus në Ukrainë. Kievi sot është zgjuar nën masa të rrepta sigurie, me qytetarët që janë ftuar të mos dalin në rrugë për të festuar, pavarësisht vlerës që merr sot “Dita e Pavarësisë”, me Ukrainën të pushtuar nga Rusia.
OKB-ja thotë se thuajse 1 mijë fëmijë janë vrarë apo plagosur në 6 muaj lufte në Ukrainë. Mbi 9 mijë janë viktimat në radhët e ushtrisë ukrainase dhe mbi 5500 mes civilëve.
Ushtria ruse, sipas të dhënave të Pentagonit, ka humbur në luftë thuajse 75 mijë forca ushtarake.
