Papa Francesku nisi sot një vizitë apostolike në Kazakistan, ku do të marrë pjesë në Kongresin e Liderëve Botërorë dhe Besimeve Tradicionale.
Takimi do të shënohet nga mungesa kontroverse e kreut të Kishës Ortodokse ruse, patriarku Kiril, i cili mbështet luftën në Ukrainë. Kirili duhej të merrte pjesë në Kongres, dha kreu i Selisë së Shenjtë në disa raste ka shprehur vullnetin për të biseduar me të.
Takimi i tyre në Kuba në vitin 2016, ishte i pari mes një pape dhe patriarku ortodoks rus që prej vitit 1054, kur krishtërimi u nda në degët lindore dhe perëndimore. Kisha Ortodokse ruse njoftoi papritur muajin e kaluar se Kirili nuk do të ishte i pranishëm.
Besimtarët ortodoksë në Rusi kanë opinione të ndryshme lidhur me mungesën, me disa që mendojnë se nuk është momenti që Papa dhe Patriarku i tyre të takohen e të tjerë që do e shihnin si të dobishme uljen e tyre në një tryezë.
“Ky është një moment i papërshtatshëm që kishat tona të komunikojnë. Fatkeqësisht ato janë ndarë dhe ne duhet ta pranojmë këtë”, thotë Georgy Krupnov.
“Mendoj se është i nevojshëm. Shenjtëria e tij është ekstremisht me eksperiencë dhe është një diplomat delikat, prandaj duhet të takohen”, thotë nga ana tjetër Vladimir Kyriev.
Patriarku Kiril është kthyer në një personazh kontrovers pasi i ofroi mbështetjen e hapur presidentit Vladimir Putin për luftën e zhvilluar në Ukrainë. Të hënën ai tha se të gjithë besimtarët duhet të luten për Putin, politikanët dhe komandantët ushtarakë që siç tha duhet të marrin vendimet e duhura në këtë kohë të vështirë.
