Është arritur marrëveshja që HSBC të blejë degën e Silicon Valley Bank në Britani të Madhe (SVB UK).
HSBC-ja tha se kishte blerë filialin britanik të SVB-së për vetëm 1 paund [1.13 euro], përcjell Telegrafi.
Siç njofton qeveria britanike, klientët dhe bizneset që kanë para të depozituara në SVB UK do të jenë në gjendje të kenë qasje në shërbimet e kësaj banke.
Ndërsa, Thesari britanik theksoi se marrëveshja me HSBC-në nuk përfshinte pagesa nga taksapaguesit.
Marrëveshja vjen pasi SVB – e specializuar në kreditimin e kompanive të teknologjisë – dështoi në SHBA, që është falimentimi më i madh i një banke amerikane që nga kriza financiare e viteve 2008-2009.
Falimentimi i kësaj banke shkaktoi valë tronditëse në të gjithë industrinë e teknologjisë, me një ndikim të mundshëm që mund të kishte te bizneset. /Deutsche Welle/
