“Koha për hapjen e negociatave është tani”, ishte theksi i Rezolutës së miratuar nga PE”, theksoi, kryetari i grupit parlamentar të Partisë Socialiste, Taulant Balla, ndërsa ka falënderuar Parlamentin Europian.
Balla shprehet se në Rezolutën e miratuar sot, Parlamenti Europian thekson se Shqipëria dhe Maqedonia plotësojnë kërkesat për të hapur negociatat për anëtarësim.
“Parlamenti shpreh zhgënjim të thellë ndaj dështimit për të rënë dakord në samitin e BE-së në 17-18 tetor, për fillimin e bisedimeve për anëtarësim me Shqipërinë dhe Maqedoninë e Veriut. Eurodeputetët shprehin keqardhje për vendimin e Francës, Danimarkës dhe Holandës për të bllokuar vendimmarrjen dhe thonë se Shqipëria dhe Maqedonia e Veriut kanë bërë përpjekje të konsiderueshme gjatë viteve të fundit dhe plotësojnë kriteret e BE-së për të filluar bisedimet e anëtarësimit”, shprehet ai.
Po ashtu ai shton se “duke vlerësuar përpjekjet e Maqedonisë së Veriut për të zgjidhur çështje të vështira dypalëshe me vendet e saj fqinje, eurodeputetët gjithashtu mirëpresin reformat e fundit të gjyqësorit në Shqipëri”.
Balla shton se Rezoluta e PE e konsideroi një gabim strategjik moshapjen e negociatave.
“Parlamenti thekson se “mosmarrja e vendimit” nga drejtuesit e BE-së është një gabim strategjik, i cili dëmton besueshmërinë e BE-së dhe dërgon një mesazh negativ për vendet e tjera potenciale kandidate. Ajo mund të mundësojë gjithashtu që aktorët e tjerë të huaj – veprimtaria e të cilëve mund të mos jetë në përputhje me vlerat dhe interesat e BE-së – të angazhohen më tepër me Shqipërinë dhe Maqedoninë e Veriut, shtojnë eurodeputetët. Një reformë e procesit të zgjerimit, e mbrojtur nga disa vende, nuk duhet të pengojë Shqipërinë dhe Maqedoninë e Veriut, të cilat tashmë plotësojnë kërkesat për t’u vlerësuar në bazë të meritave të tyre dhe kritereve objektive, dhe jo të gjykohen nga axhendat politike të brendshme në vendet e tjera, thuhet në tekst”.
Po ashtu Balla shton se Rezoluta e PE-së thekson se koha për hapjen e negociatave është tani.
“Eurodeputetët u kërkojnë vendeve të BE-së të veprojnë me përgjegjësi ndaj Shqipërisë dhe Maqedonisë së Veriut dhe të marrin një vendim unanim pozitiv në mbledhjen e ardhshme. Parlamenti duhet të rrisë aktivitetet e tij të mbështetjes së demokracisë për të siguruar që parlamentet kombëtarë në Ballkanin Perëndimor të luajnë rolin e tyre si motorë për reformat demokratike, shtojnë ata”, thuhet në njoftimin për shtyp të Parlamentit Europian”, shprehet ai.
Gjithashtu Balla shton se teksti i Rezolutës u miratua me 412 vota pro, 136 kundër dhe 30 abstenime.
