Kryeministri Edi Rama çeli sot fushatën elektorale për zgjedhjet e 14 majit në Pogradec, ku prezantoi, për të kandiduar për një tjetër mandat, kryebashkiakun aktual Ilir Xhakolli.
Rama i ka kërkuar grave, burrat e të cilave janë mbështetës të opozitës, që t’i mbyllin ata në shtëpi në ditën e votimit.
Rama shtoi se opozita kërkon t’i fitojnë bashkitë për t’i përdorur si “kështjella rezistence” ndaj qeverisë dhe për të nxjerrë qytetarët në protesta e për të thënë “Rama ik”.
“Kemi një projekt që do ta transformojë Pogradecin, njësoj siç Lungomare transformoi Vlorën. 38 mijë lekë ishte edhe parashikimi i tyre për pagën minimale deri në vitin 2025. Nuk do e quajmë detyrën të përmbushur pa e çuar pagën minimale në 600 euro. Natyrisht, rritja e madhe e pagave, do të na japë më shumë contribute shoqërore dhe do i mbështesim më shumë pensionistët tanë. Do vazhdojmë të mos lëmë rast dhe momenti pa iu shërbyer dhe pa shpërblyer më shumë pensionistët. Këto zgjedhje e kemi shumë të thjeshtë.
Duhet të vendosim në 14 maj se kë do të marrim në punë, për të qëndruar në krye të punëve. Këtu i kishit në krye të bashkisë, mbeti bashkia e Pogradecit si jetime, në krahasim me bashkitë e tjera që ecën shumë përpara. Nuk ka një shembull në bashkitë e vendit, që të tregojë se po u’a dhe atyre drejtimin mund të bëjnë ndryshime. Ne e kemi në gjak, e kemi në kulturën e punës, e kemi pjesë të pandashme të arsyes se përse merremi me politikë. Ne themi atë që bëjmë dhe bëjmë atë që themi. Ata sot që nga 92-shi drejtojnë Shkodrën dhe Shkodra është e vetmja bashki që kazanët mbulohen nga plehrat. Ndërkohë që sot bashkitë e tjera janë të pastra.
Ata nuk ndërrojnë dot një llampë, ju pëlqen errësira, ju pëlqen pisllëku. Ju pëlqejnë ndërtimet pa leje. Do i kërkoja grave këtu që i kanë burrat me mendjen mbrapsht, që t’i mbyllin burrat në shtëpi në 14 maj. Këto janë zgjedhje sesi do të jetë rruga kur të dalim nga shtëpia. Po rrugët do vijojnë të jenë të ndriçuara, që kur vajzat të kthehen në shtëpi natën, familjarët të mos rrinë me ankth se mos i ha ujku?”, tha Rama.
Sipas tij, vota e zgjedhjes së kryetarit të bashkisë është vajtja në pazar të blesh kalin e të tërheqësh karrocën.
“Gomari është personalitet, ka mbajtur Perëndinë mbi shpinë. Për më tepër sot, le ta themi se janë në ditën më të keqe, janë të diskredituar totalisht, nuk i do njeri t’i shohë me sy. Lufta e tyre për të fituar ndonjë bashki tek-tuk është për t’i mbajtur peng dhe për të paguar autobusët të nxjerrin njerëzit që të thonë ‘Rama ik’ atje. Edhe unë këtu jam.
Unë do iki kur ta vendosim bashkë, por jo kur thonë ata Rama ik. Ata për mua janë bërë si hudhra, jam në rregull unë me ata. Problemi është se nuk merren të futen nëpër bashkira. Se për hudhra mirë, shyqyr që i kemi. Kështu miqtë e mi. Ju falënderoj shumë dhe kam shumë besim, më 14 maj kam besim te gratë. Burrat të na japin atë votën e tyre, faleminderit shumë dhe të vazhdojnë të luajnë dhe të kuvendojnë. Gratë mund të na japin shumë më tepër se votën e tyre dhe unë jam i bindur se do të na japin. Kështu që…dhe nëse ndonjë nga ato shoqet a zonjat, quajini si të doni që kanë burrat me mendjen mbrapa…ju thonë ‘po s’kam ç’i bëj burrit se është i djathtë’, thojini, por mirë si do dal unë nga shtëpia, do marrësh rrugën, do mbash radhë që të votosh Like floririn? Si? Se dhe atë tjetrin, hajt më s’e ke farë në fletën e votimit. Ai ka ik nga fleta e votimit. Nën sqetullën e Like floririt. Ja ku u katandis partia e madhe. Aman o Like na merr me vete! Kështu që gratë e kuptojnë mirë këtë punë. Tani turruni nëpër gjitone, burrë më burrë, koka mbrapa, çelësi mbyllur brenda”, u shpreh Rama.
