Konferenca Mesdhetare e OSBE-së që ka kulmuar me kryesimin e Grupit të Kontaktit për Mesdheun nga Shqipëria, me pjesëmarrjen e 57 vendeve anëtare, si dhe vendeve mesdhetare, si: Egjipti, Jordania, Izraeli, Algjeria, Maroku dhe Tunizia, ka mbyllur siparin në Tiranë.
Ministri në detyrë për Evropën dhe Punët e Jashtme, Gent Cakaj, u shpreh në mbyllje të kësaj Konference se Shqipëria ka zhvilluar një program përmbajtjesor bashkëpunimi në fushën e rinisë, ekonomisë, energjisë, sulmeve kibernetike dhe luftës kundër terrorizmit.
“Sot mbyllëm Konferencën Mesdhetare në Tiranë. Si kryesuese e Grupit të Kontaktit të Mesdheut, Shqipëria ka zhvilluar një program përmbajtjesor bashkëpunimi në fushën e rinisë, ekonomisë, energjisë, sulmeve kibernetike dhe luftës kundër terrorizmit,” shprehet Cakaj.
Sipas tij, bashkëpunimi me Mesdheun do të jetë në qendër të kryesisë shqiptare të OSBE-së gjatë vitit 2020.
“Në takim u diskutuam një varg ndryshimesh strukturore në funksion të forcimit të marrëdhënies mes vendeve pjesëmarrëse të OSBE-së dhe partnerëve të Mesdheut. Bashkëpunimi me Mesdheun do të jetë edhe në qendër të Kryesisë Shqiptare të OSBE-së 2020”, deklaroi Cakaj./ATSH/
