Me një garë tashmë të mbyllur për Bashkinë Tiranë, ku i mandatuar për të tretën herë ka rezultuar kandidati i Partisë Socialiste Erion Veliaj, me interes është të shihet edhe si përpunohen të dhënat e tjera domethënëse.
Në tërësi në kryeqytet, pjesëmarrja ka qenë në kuotën e 43%, duke paraqitur konkretisht të dhënat se 302 mijë e 374 persona, kanë votuar prej 699 mijë e 766, të cilët e kanë pasur të drejtën në tërësi.
Votat e vlefshme gjithsesi, kanë qenë 290 mijë e 265.
Kjo na jep edhe pasqyrimin se ka pasur 11 mijë e 912 qytetarë, të cilët kanë kundërshtuar secilin nga gjashtë kandidatët në fletën e votimit, duke djegur votën e tyre.
Ndërkohë, ka pasur edhe një numër të vogël prej 339 fletësh, të cilat janë hedhur në kutitë e gabuara.
Një shifër e reflektuar prej 11 mijë e 912 qytetarësh, të cilët i janë drejtuar kutive, por e kanë djegur votën e tyre, është për t’u marrë parasysh në Tiranë.
Mbi të gjitha, kur kjo shifër është thuajse ekuivalente me votat që kanë marrë fjala bie kandidati i Lëvizjes Bashkë, Arlind Qori, apo ai i Partisë Demokratike, Roland Bejko.
Po ashtu, shifra reflekton një kuotë prej 10% të votave që ka marrë kandidati kryesor opozitar, Belind Këlliçi, i Koalicionit Bashkë Fitojmë, i cili thjesht e ka kaluar kuotën e 100 mijë votëbesimeve në kryeqytet.
