Një alpinist nga Nepali ka arritur t’i pushtojë 14 malet më të larta për pak më tepër se gjashtë muaj, duke vendosur rekord. Alpinistëve të tjerë në të kaluarën iu janë dashur vite për të kompletuar pushtimin e 14 majave më të larta në botë.

Alpinisti 36-vjeçar, Nirmal Purja, ka kompletuar këtë mision të martën në mëngjes, kur arriti në majë të malit Shishapangma në Tibet, së bashku me një ekip të sherpave.
“Misioni është kompletuar!”, shkroi ai një mesazh të thjeshtë në rrjetet sociale, shkruan sot Koha Ditore.

Në një komunikatë më vonë, ai ka shtuar: “Ka qenë e lodhshme, por gjashtë muaj të mëdhenj për mua dhe shpresoj të kem dëshmuar se çdo gjë është e mundur nëse ke vendosmëri, vetëbesim dhe pozitivitet”.

Një zëdhënës i “Seven Summit Treks”, kompani me seli në Nepal, që ka ndihmuar të organizohen disa prej ekspeditave të Purjas, ka thënë nëpërmjet telefonit se është në kontakt me ekipin e alpinistit dhe është konfirmuar se ai ka arritur majën e Shishapangmas.

Tentimi për të arritur në majë të gjithë maleve që janë mbi 8.000 metra, të cilin Purja e quajti “Projekti i Mundshëm”, nisi në prill, kur ai pushtoi Annapurnan, që është 8.091 metra. Ai më pas shpejt shënjestroi 13 majat e tjera, të gjitha në Himalaje dhe Karakoram, që shtrihen përgjatë Kinës, Indisë, Nepalit e Pakistanit.