Dibra ka qenë stacioni i rradhës i ish kryetarit të PD-së, Lulzim Basha, si pjesë e një turi takimesh që ai po zhvillon në disa qytete të vendit.
Nëpërmjet një postimi në rrjetin e tij social Facebook, Basha shprehet se me qendrestarët e Partisë Demokratike të Dibrës, ka diskutuar hapur mbi të gjitha çështjet që kërkojnë vendimmarrje të rëndësishme për të ardhmen e PD-së dhe të Shqipërisë.
Sipas tij, demokratët do të bashkohen përmes vlerave, duke lënë pas, sipas Bashës, “mendësinë konfliktuale dhe ndasitë artificiale të shkaktuara nga interesi personal i një individi që për hallin personal ndezi zjarrin e ndasisë brenda familjes tonë politike”.
“Që Partia Demokratike të kthehet pranë qytetarëve, të dëgjojë ata dhe të ofrojë një alternativë për problemet e tyre, duhet të shkëputet nga teatri shterp i politikës, që asgjë të mirë nuk sjellë për jetët e njerëzve. Partia më e madhe e 14 majit ishte ajo e shumicës së heshtur që refuzoi të zgjedhë midis dy të këqijave.
Ne duhet të shtrijmë dorën e bashkëpunimit ndaj kujtdo që është gati për të ndryshuar nga themelet sistemin politik, për të kthyer vendimmarrjen te qytetarët nëpërmjet listave të hapura, vetting-ut të politikanëve, kufizim të mandatit të kryeministrit dhe garantimin e votës së diasporës.”- shkruan Basha.
