Në parlamentin shqiptar Komisioni për Politikën e Jashtme i ka dhënë dritën jeshile zbatimit të marrëveshjes së nënshkruar mes qeverisë shqiptare dhe asaj malazeze për çeljen e një pike të re kufitare Shën Nikollaj-Pulaj. Kjo pikë kufitare vjen në kuadër të ndërtimit të urës mbi Lumin Buna, e cila do të afrojë më tej dy vendet.
Julian Hodaj, zv/ministër i Brendshëm, tha se marrëveshja është pjesë e serive të marrëveshjeve të nënshkruara mes Shqipërisë dhe Malit të Zi, gjatë mbledhjes së dy qeverive në Podgoricë, më 27 shkurt 2023.
“Pika do të jetë funksionale 24 orë në ditë, në të 7-a ditët e javës. Do t’i vijë në ndihmë pasagjerëve dhe mjeteve të tyre. Do të ketë modelin e pikës kufitare të Muriqanit, e cila është me një pikë kontrolli e përbashkët me modelin “One Stop Shop”, pra një ndalim, një kontroll. Të gjithë kemi pasur eksperiencë se sa kohë kursehet në këtë formë”, bëri të ditur Hodaj.
Vënia në funksionim e pikës kufitare Shën Nikollaj-Pulaj ka disa përparësi, si në nivelin e bashkëpunimit policor, ashtu edhe në bashkëpunimin ekonomik. Ajo do të lehtësojë qarkullimin e mjeteve dhe shtetasve në kalimin e kufirit, si në regjistrim ashtu edhe kontroll.
Kalimi në do të lehtësojë edhe pikën kufitare të Muriqanit. Në Muriqan kalojnë rreth 600 000 shtetas shqiptarë dhe të huaj vajtje-ardhje në vit.
Marrëveshja e nënshkruar me 27 shkurt 2023, në Podgoricë nga Kryeministri Edi Rama dhe homologu malazez, Dritan Abazoviç përmban 18 nene.
