Policia ende nuk ka rënë në gjurmët e autorit të grabitjes me armë të pikës së këmbimit të parave në zonën e Astirit.
Grupi hetimor dyshon se personi që hyri me një pistoletë në dorë me kapele dhe me një maskë mjekësore brenda ambienteve të exhchange mund të ketë pasur informacion mbi ekzistencën e shumës monetare.
Gjithashtu policia ka nisur verifikimet për dy punonjëset e pikës së këmbimit valutor që ndodheshin aty në momentin e grabitjes.
Gjatë ditës së djeshme policia ka marrë edhe deklarimet e tyre, të cilat kanë sqaruar përpara hetuesve të gjithë dinamikën..
Verifikimet kanë nisur me dyshimet, nëse ndonjë prej tyre ka bashkëpunuar me autorin nisur edhe nga dera që ka qenë e hapur për t’u futur autori lehtësisht në vendin ku ndodheshin paratë.
Autori dyshohet se për 1 munitë e 20 sekonda ka marrë të paktën 30 mijë euro dhe është larguar me një biçikletë.
Për gati 800 m nga vendi ku ndodhet exchange-i autori është survejuar nga kamera sigurie, por më pas ai humb gjurmët nëpër rrugicat dhe lagjet e Astirit.
Grupi hetimor nuk përjashton mundësinë që autori të ketë pasur bashkëpunëtorë dhe ndonjë automjet mund ta ketë pritur në këtë ambient pa kamera dhe e ka larguar nga aty.
