Ministria e Jashtme i është përgjigjur deklaratës së zëdhënësit të Qeverisë së Greqisë, lidhur me rastin e arrestimit të Fredi Belerit. Në reagim, Ministri a e Jashtme dënon deklaratën, duke e konsideruar të pavend dhe që injoron realitetin demokratik të sundimit të ligjit në Shqipëri.
“Kemi ndjekur me keqardhje deklaratën e zëdhënësit të Qeverisë Greke lidhur me rastin Beleri. Siç e kemi deklaruar në vijimësi, publikisht por edhe gjatë komunikimeve që kemi pasur me kolegët tanë grekë, deklarata të tilla janë të pavend dhe injorojnë realitetin demokratik dhe të sundimit të ligjit ne Shqipëri. Qeveria e Shqipërisë as nuk burgos, as nuk paraburgos kënd, sepse Shqipëria është një vend demokratik ku sundon parimi i ndarjes së pushteteve”, thuhet në reagim.
Ministria e Jashtme thekson se Beleri është subjekt i SPAK dhe GJKKO dhe se Qeveria Shqiptare nuk komenton veprimet e këtyre dy strukturave. Po ashtu i bëhet thirrje Qeverisë së Greqisë që të presë përfundimin e hetimeve dhe vendimin e Gjykatës në lidhje me këtë çështje.
“Theksojmë me këtë rast se shtetasi shqiptar me kombësi greke Fredi Beleri është subjekt i Prokurorisë dhe Gjykatës Speciale kundër Krimit të Organizuar e Korrupsionit, struktura të krijuara nga Reforma në Drejtësi, e cila është fryt i bashkëpunimit strategjik me SHBA dhe BE. Qeveria Shqiptare nuk komenton veprimet dhe vendimet e këtyre strukturave. Ky parim vlen në rastin e z. Beleri ashtu si edhe në rastin e çdo qytetari tjetër shqiptar, në Shqipëri aq sa edhe në Greqi apo cilindo vend demokratik në Europë e botë, prandaj e ftojmë Qeverinë e Greqisë të bëjë të njëjtën gjë dhe të presë, ashtu si ne, që drejtësia të bëjë punën e saj”, përfundon reagimi.
Beleri u arrestua më 12 maj, ndërsa hetimet ndaj tij kishin nisur më 9 maj pas referimit të rastit nga policia e Vlorës, dhe u mbështet me pamje filmike dhe përgjime pasi një agjent i infiltruar i policisë, përgjoi momentin kur bashkëpunëtorët Belerit dhanë 40 mijë lekë për 8 vota.
Në zgjedhjet e 14 majit Beleri, kandidati i koalicionit “Bashkë Fitojmë” u shpall fitues në Bashkinë Himarë përballë Jorgo Goros me një diferencë prej 19 votash.
Më 26 qershor u konstituua Këshilli Bashkiak i Himarës, por pa prezencën e Belerit, të cilit iu rrëzua kërkesa nga GJKKO për të qenë i pranishëm.
