Presidenti në ikje i Komisionit Europian, Jean-Claude Juncker e gjykoi si jorealist propozimin e liderit të opozitës britanike, laburistit Jeremy Corbyn për të negociuar një marrëveshje të re daljeje nga Bashkimi Europian.
“Unë nuk do të jem më në detyrë, do të varet nga Komisioni tjetër që të vendos nëse ka apo jo vend për një marrëveshje të re, por sinqerisht, nuk mendoj se kjo është një qasje realiste”, deklaroi Juncker në një intervistë për BBC.
Në prag të zgjedhjeve parlamentare të 12 dhjetorit në Britaninë e Madhe, të nxitura për të nxjerrë Brexit-in nga ngërçi, kryeministri konservator, Boris Johnson po bën fushatë për marrëveshjen e daljes nga BE që arriti muajin e kaluar në Brukseli, me shpresën për të marrë një shumicë të pastër në parlament për ta vënë atë në zbatim.
Nga ana e tij, kreu i laburistëve, Jeremy Corbyn, premton se në rast fitoreje ai do të negociojë një marrëveshje të re për daljen nga BE, të cilën do t’ia nënshtrojë një referendumi të ri dhe që ka si alternativë qëndrimin në bllokun europian./ATSH/
