Një i vrarë dhe tre të plagosur është bilanci i të shtënave me armë gjatë orëve të para të mëngjesit në një kafe në fshatin Runik të Skënderajt, në Kosovë.
Dy persona të maskuar hynë dhe filluan të qëllojnë me armë, duke i sjellë plagë vdekjeprurëse 39-vjeçarit Nexhmedin Loshi.
Policia e Kosovës bëri me dije se ngjarja ndodhi rreth orës 01:20.
“Bazuar në hetimet fillestare, nga arma e zjarrit lëndime kanë pësuar katër persona, njëri nga të lënduarit viktima N. L., 39-vjeçar, ka ndërruar jetë në vendngjarje, ndërsa, tre persona të tjerë të lënduar (po ashtu nga arma e zjarrit) janë dërguar për tretman mjekësor në QKUK.
Nga hetimet e para dhe këqyrja e vendit të ngjarjes, dyshohet se dy persona të dyshuar e të maskuar kanë hyrë brenda në kafiteri kanë shtënë me armë dhe janë larguar në drejtim të panjohur. Në cilësi të provave materiale në vendin e ngjarjes janë gjetur dhe konfiskuar disa gëzhoja,” thuhet në njoftim.
Zëdhënësja e Qendrës Klinike Universitare të Kosovës (QKUK) tha se njëri nga të lënduarit është në gjendje të rëndë, ndërsa dy të tjerët janë jashtë rrezikut për jetën.
“Një i lënduar nga arma e zjarrit është sjellë nga Spitali i Mitrovicës në Qendrën Emergjente të QKUK-së. Pas ekzaminimeve është vërejtur që ka indikacion për intervenim kirurgjik. Lëndimi ka qenë në anën e djathtë, një lëndim në regjionin e nëngjurit,” deklaroi shefi i Intensives, Shaqir Uka.
Në Kosovë kanë ndodhur disa vrasje brenda javës në rrethana të ngjashme.
Të premten e 4 gushtit, në një lokal të Prishtinës mbeti i vrarë një person, ndërsa 20 të tjerë morën lëndime nga arma e zjarrit.
Po ashtu, të hënën në një lokal në Klinë, për motive ende të panjohura u qëllua me armë një 47-vjeçar, i cili humbi jetën si pasojë e plagëve.
