Tre persona janë vrarë nga sulmet me raketa ruse në rajonin Volyn në veri-perëndim të Ukrainës, kanë thënë zyrtarët lokalë.
Disa u plagosën pasi një ndërtesë industriale në Lutsk u godit, tha kreu rajonal Yuriy Poguliaiko.
Sulmet ajrore dëmtuan gjithashtu ndërtesa në rajonin perëndimor të Lviv, por nuk pati të vdekur, tha kryebashkiaku i qytetit.
Forcat e mbrojtjes ajrore të Ukrainës thanë se kishin shkatërruar 16 nga të paktën 28 raketa të lëshuara nga Rusia gjatë natës.
Sirenat e sulmit ajror ranë për dy orë në Lviv dhe Volyn.
Në Lutsk – kryeqyteti i rajonit Volyn – bizneset dhe shtëpitë duket se janë goditur, me zyrtarët lokalë që thonë se shumica e dëmeve është shkaktuar nga rënia e mbeturinave nga raketat e kapura.
Nënkryetari i zyrës së presidentit ukrainas Volodymyr Zelensky, Oleksiy Kuleba, tha se tre personat e vrarë në ndërtesën industriale ishin punonjës.
Në Lviv më shumë se 100 ndërtesa u dëmtuan si rezultat i sulmeve gjatë natës, sipas kryetarit të bashkisë së qytetit Andriy Sadovyi.
Një shesh lojrash në qytet u godit nga një raketë, tha zoti Sadovyi, e cila la pas një krater 9 metra të thellë dhe 20 metra të gjerë.
Ai shtoi se katër persona kanë mbetur të plagosur, por asnjë nuk është në rrezik për jetën.
Duke përshkruar incidentin, banori lokal Dmytro Ivaschyshyn i tha Reuters: “Fëmijët u fshehën në banjë… Ata ishin histerikë, po dridheshin”.
Mbetjet nga raketat dëmtuan gjithashtu dy ndërtesa fermash në qytetin perëndimor të Ivano-Frankivsk, raportoi zoti Kuleba.
Më afër vijës së frontit, një ndërtesë tregtare u godit në rajonin juglindor të Dnipropetrovsk gjatë natës.
Një person u vra dhe një tjetër u plagos në qytetin e Kramatorsk në rajonin lindor të Donetsk, tha zoti Kuleba.
Ai shtoi se fshatrat në rajonet Zaporizhzhia dhe Cherkasy u goditën gjithashtu nga sulmet, të cilat synonin një institucion arsimor, ndërtesa banimi dhe një strukturë mjekësore.
