Presidenti aktual Sauli Niinisto, i pëlqyer në mesin e finlandezëve për qasjen e tij pragmatike dhe të qetë, po largohet në moshën 74-vjeçare, pasi ka përfunduar dy mandate gjashtë-vjeçare.
Ish-kryeministri konservator i Finlandës, Alexander Stubb, ka shpallur kandidaturën e tij në zgjedhjet presidenciale të janarit, për të pasuar Sauli Niinisto, i cili do të tërhiqet pas dy mandatesh si president.
“Kur vendi ju thërret, ju shkoni atje ku ju thërret”, tha Stubb në një konferencë shtypi, duke iu referuar faktit se kryeministri konservator Petri Orpo dhe partia e tij i kanë kërkuar atij të jetë kandidati i tyre.
55-vjeçari Stubb shërbeu si kryeministër i Finlandës nga 2014 deri në 2015. Ai ka shërbyer edhe si Ministër i Financave, Punëve të Jashtme dhe Evropiane. Aktualisht jep mësim në Institutin Universitar Europian në Firence, Itali.
“Unë besoj se një nga misionet më të rëndësishme të mandatit të ardhshëm presidencial do të jetë që presidenti të punojë për të ruajtur sistemin ndërkombëtar, të bazuar në rregulla”, theksoi Stubb.
“Presidenti i ardhshëm do të marrë detyrën në një botë në ndryshim që është pjesërisht më e pasigurtë dhe pjesërisht më e brishtë se ajo me të cilën jemi mësuar pas vitit 1989”, shtoi ai.
Në Finlandë, presidenti është kreu i shtetit dhe komandanti suprem i forcave të armatosura. Ai ndan me qeverinë përgjegjësinë për mbrojtjen dhe politikën e jashtme, me përjashtim të çështjeve evropiane.
Presidenti aktual Sauli Niinisto, i pëlqyer në mesin e finlandezëve për qasjen e tij pragmatike dhe të qetë, po largohet në moshën 74-vjeçare, pasi ka përfunduar dy mandate gjashtë-vjeçare.
Zgjedhjet presidenciale do të mbahen më 28 janar 2024.
