41 turistë polakë janë helmuar dhe janë paraqitur për të marrë ndihmën e shpejtë në spitalin e Vlorës.
Dyshohet se helmimi është shkaktuar nga ushqimi i konsumuar.
Sipas drejtoreshës së spitalit, Bruna Mersini, mes të helmuarve janë rreth 20 fëmijë.
“Fëmijët janë të moshës 14 dhe 15 vjeç. Ata kanë udhëtuar gjithë ditën. Kanë ardhur nga Shkodra dhe pas udhëtimit kanë marrë anijen për në Karaburun. Janë paraqitur me çrregullime gastrointestinale. Situata është nën kontroll. Vapa mund ta ketë shkaktuar situatën, por pa u bërë hetimi nuk japim dot të dhëna,” tha Mersini.
Disa prej fëmijëve janë çuar në Spitalin Memorial të Fierit.
Drejtoria Rajonale e Autoritetit Kombëtar të Ushqimit Vlorë në një deklaratë shprehu shqetësimin për incidentin e fundit, ku ishin të përfshirë disa pacientë të rinj nga Polonia.
AKU me këtë rast u bëri thirrje operatorëve të kenë kujdes dhe të mos operojnë me shërbim ushqimi pa qenë të autorizuar e të licensuar lidhur me kriteret e sigurisë ushqimore dhe të kenë kujdes me kushtet e ruajtjes në temperaturat e larta të sezonit.
AKU udhëzon konsumatorët të mos konsumojnë ushqime që kanë qëndruar për më shumë se 2 orë pas gatimit jashtë frigoriferit.
