Shtatori është muaj shumë i rëndësishëm për Prokurorinë dhe Gjykatën e Posaçme. Kjo për shkak të dosjeve hetimore të hapura gjatë stinës së nxehtë që lamë pas. Ndonëse duhet të ishte një muaj frymëmarrjeje , gushti nuk kaloi i tillë për prokurorët e SPAK dhe gjyqtarët GJKKO.
Dy dosje të rëndësishme e trazuan si krimin ashtu edhe politikën. Fillimisht ishte operacioni “Metamorfoza”. Çkodimi i një aplikacioni që gjerësisht përdorej nga njerëz të krimit, çoi në zbardhjen e disa ngjarjeve të renda . Aty flitej për eleminime të kundërshtarëve, atentate të pa përfunduara, prishje të provave në bashkëpunim me policë, deri tek pagesat për të ndërhyrë në drejtësi. Në rrjetën e SPAK-ut ranë 15 persona mes tyre vrasës të dyshuar me pagesë, një biznesmen, shefi i operacionales, Oltion Bistri dhe prokuroiri i Kukësit, Xhevahir Lika.
Një tjetër dosje që shkaktoi zhurmë ishte ajo e sterilizimit. Është kallëzimi i parë që iu drejtua SPAK-ut kur kjo strukturë nisi punën. Pas 3 vitesh hetimi, prokurori, Edvin Kondili, i kërkoi Gjykatës së Posaçme arrestimin e 2 personave, ish- zëvendës ministrin e Shëndetësisë, Klodian Rjepaj, dhe biznesmeni i koncensionit, Ilir Rrapaj, ndërsa me masë më të lehta si “arrest në shtëpi” apo “detyrim paraqitjeje” për 6 persona të tjerë, pjestarë të komisionit të ofertave.
Ky i fundit u ripyet nga prokurorët e posaçëm, ndërsa portën e SPAk-ut pritet ta kalojë gjatë këtij muaji edhe njëherë, ilir Beqaj. Atij do ti duhet të shpjegojë njohjet me biznesmenin që përfitoi koncensionin me vlerë afro 100 milionë euro.
Por muaji shtator vijon edhe me dosjet që janë në proces gjykimi. Më 6 shtator avokatëve të ish- ministrit të Mjedisit, Lefter Koka, do tu duhet të parashtrojnë mbrojtjen pasi SPAK ka kërkuar dënimin e tij me 10 vite burg. Një tjetër ish zyrtar për të cilin kërkohet dënimi me 7 vite burg në të njëjtën aferë të inceneratorit të Fierit, është edhe ish- deputeti, Alqi Bllako.
Dy ish- zyrtarët do të jenë protagonistë edhe një javë më pas ku pritet të shpallet vendimi për aferën e inceneratorit të Elbasanit. Në pretencën e prokurorisë kërkohet dënimi me nga 10 vite burg, si për Kokën ashtu edhe Bllakon.
Në proces gjykimi është edhe ish- minsitri i Mbrojtjes, Fatmir Mediu. Dosja “Gërdeci” u rihap pas 12 vitesh. Ish- ministri akuzohet dy herë për shpërdorim detyre në ngjarjen tragjike që shkaktoi vdekjen e 26 personave. Seanca e radhës ndaj tij është parashikuar më 8 shtator.
Ky do të jetë sezon i mbingarkuar për drejtësinë pasi, siç mund ta shikojmë edhe nga tabela, lista me emra VIP është e gjatë. Katër ish- kryebashkaikë, një tjetër i zgjedhur, një ish- ministër, vartësi i tij dhe një ish- zëvendës ministër ndodhen pas hekurave, ndërkohë në arrati vijon të mbetet ish- zëvendëskryeministri, Arben Ahmetaj .
- LEFTER KOKA- ish- ministër
- ALQI BLLAKO – ish- deputet
- ARBEN AHMETAJ- ish- zv. Kryeministër (në arrati)
- KLODIAN RJEPAJ- ish-zv. minister
- FATMIR MEDIU- ish- minister
- VANGJUSH DAKO- ish- kryebashkiak
- LEFTER ALLA- ish- kryebashkiak
- FRAN TUCI- ish- kryebashkiak
- SAFET GJICI- ish- kryebashkiak
- FREDI BELERI- kryebashkiak i zgjedhur
