Ministri i Jashtëm grek, Jorgos Jerapetritis (o. Giorgos Gerapetritis) i ka dërguar sërish mesazh Shqipërisë se perspektiva evropiane e vendit lidhet me respektimin e të drejtave të pakicës kombëtare greke.
Duke folur për zgjerimin e BE-së në një konferencë ndërkombëtare në Athinë, Jerapetritisi theksoi se Athina nuk mund të pranojë vende kandidate që nuk plotësojnë kriteret e anëtarësimit “dhe mbi të gjitha parimet bazë të godinës evropiane, veçanërisht demokracia dhe gjendja e drejtësisë”.
Ai iu referua konkretisht rastit të kryetarit të Bashkisë së Himarës, Alfred Beleri, duke e shprehur për sjellje dhe praktika që, sipas tij, tregojnë se këto parime nuk janë zbatuar ende nga të gjitha vendet kandidate.
“Shqipëria duhet të dëshmojë se respekton të drejtat e pakicës kombëtare greke dhe shtetin e së drejtës,” theksoi ministri i Jashtëm, sipas cnn.gr.
Për të rigjallëruar procesin e zgjerimit në Ballkanin Perëndimor, Jerapetritisi përsëriti mbështetjen e Greqisë për integrimin në BE të vendeve të Ballkanit Perëndimor, si dhe të Ukrainës dhe Moldavisë, duke shtuar se procesi i zgjerimit duhet të rigjallërohet.
“Në këto kohë të vështira, një BE e fortë, elastike dhe gjithëpërfshirëse, me synimin e arritjes së autonomisë strategjike, është gur themeli i paqes dhe prosperitetit për qytetarët e saj,” theksoi ai, duke shtuar se Greqia, si shteti më i vjetër anëtar i BE-së në rajon, ka për detyrë të udhëheqë Ballkanin Perëndimor në rrugën drejt integrimit evropian.
Ai shtoi se kjo është rruga më e sigurt për paqen, stabilitetin, demokracinë dhe prosperitetin, “siç diktohet nga interesi i Greqisë dhe fqinjëve të saj, interesi i rajonit dhe i Bashkimit Evropian”.
