“Mesazh i qartë për Ramën që të hapë rrugën për zgjedhje të lira, zgjedhje të parakohshme parlamentare dhe zgjedhje vendore sipas Kushtetutës”, tha sot kryetari i Partisë Demokratike, Lulzim Basha, në takim me fermerët e Lezhës.
Në bashkëbisedim me fermerët, Basha tha se kjo qeveri e ka braktisur tërësisht fermerin dhe zhvillimin rural. “Këtë e shohim çdo ditë. Presioni që ndjejnë nga shteti i ka shtyrë ata drejt braktisjes totale të këtij sektori. Kam ardhur për t’u thënë se nuk ka nevojë të jetë kështu. Jehona e zërit tuaj ka rëndësi”, tha Basha.
“Të gjithë e dëgjuam jehonën e shqiptarëve, mesazhin e qartë të shqiptarëve krenarë dhe të vendosur, që i thanë Edi Ramës largohu, çliroje vendin nga qeverisja jote e dështuar. Hap rrugën. Nuk është vetëm opozita, por janë të gjithë shqiptarët që e kërkojnë këtë. Ndaj bën mirë të dëgjojë zërin e shqiptarëve dhe të hapë rrugën për zgjedhje të lira dhe të ndershme, zgjedhje të parakohshme parlamentare dhe zgjedhje vendore sipas Kushtetutës, që janë dhe zgjidhja e kësaj krize të rëndë që ka pllakosur”, theksoi Basha.
Në vijim, Basha tha se PD ka një platformë me propozime të qarta që nesër, sipas tij, në qeveri “të jemi në krahun tuaj”.
“Siç e keni ndjekur kjo platformë fillon me vendosjen e bujqësisë si prioritet të parë të buxhetit të shtetit. Buxheti për 2020 i Edi Ramës jep 120 milionë euro për 10 oligarkë, për fermerët vetëm një të dhjetën”, tha Basha.
“Kush ka mend t’u verë veshin atyre njerëzve që ushtuan nga stadiumi. Nuk është vetëm opozita, por i gjithë populli që kërkon ndryshim, dhe ndryshimi bëhet nëpërmjet votës tuaj, dhe vota juaj do hidhet për programin që zgjidh problemet tuaja, dhe zgjidhjet po kështu të jenë produkt i diskutimit të përbashkët, jo premtime false e propagandë që bie menjëherë”, tha ai./ATSH/
