Këshilltari i Departamentit Amerikan të Shtetit, Derek Chollet ka deklaruar se ka biseduar me kryeministrin e Kosovës Kurti dhe presidentin e Serbisë Aleksandër Vuçiq, për sulmin terrorist serb të ditës së 24 shtatorit. Chollet ka dënuar sulmin ndaj Policisë së Kosovës teksa ka shprehur ngushëllimet për vdekjen e rreshterit Afrim Bunjakut.
Këshilltari i Departamentit Amerikan të Shtetit shkruan në platformën‘X’se e të dyja palët duhet t’i kthehen dialogut të lehtësuar nga BE-ja dhe të zbatojnë zotimet e Ohrit.
“Biseduam me kryeministrin e Kosovës, Albin Kurti për sulmin e tmerrshëm të së dielës në Kosovë. Dënojmë ashpër dhunën kundër Policisë së Kosovës; shpreha ngushëllime për humbjen e rreshterit Afrim Bunjaku. Të dyja palët duhet të kthehen në dialogun e ndërmjetësuar nga BE dhe të zbatojnë zotimet e Ohrit”, ka shkruar ai.
Mëngjesin e së dielës së 24 shtatorit, si pasojë e përplasjes me armë mes grupeve terroriste serbe dhe policisë së Kosovës mbeti i vrarë rreshteri Afrim Bunjaku. Ndërsa pas reagimit të Policisë së Kosovës ndaj grupeve të armatosura serbe në Manastirin e Banjskës mbetën të vrarë tre agresorë ndërsa një tjetër u gjet i pajetë ditën e djeshme.
