Ish përgjegjësi i fabrikës ku demontoheshin armët në Gërdec, Veiz Muça, ka qenë të premten dëshmitari i radhës, i marrë në pyetje nga Gjykata e Posaçme në procesin ndaj ish-ministrit të Mbrojtjes, Fatmir Mediu, lidhur me shpërthimin e depos që ndodhi në Gërdec, duke shkaktuar një tragjedi me 26 viktima.
Ai, në mënyrë të detajuar, ka treguar se në punë shkeleshin pothuajse të gjitha rregullat.
“Në Gërdec kam punuar nga 12 Qeshori 2007 deri me15 Mars 2008. Në punë më ka marrë Dritan Minxolli. Atë e njihja dhe i kam kërkuar punë. Delijorgjin nuk e njoh, e kam pare, por ai s’ka pasur kontakt me mua. Fillimisht isha brigadier dhe kontrolloja punën e atyre që merreshin me shkarkimin e predhave.”, tha Veizi.
Sipas tij, punëtorët i hidhin predhat tutje dhe për këtë është zënë me Dritan Minxollin, pasi I ka thënë se “punëtorët nuk janë të kujdesshëm”.
“Ai me shkarkoi nga aty dhe më dërgoi diku tjetër, po brigadier. Aty vinin të gjitha llojet e predhave të artilerive. Për predhat 100 mlm kishte një poligon (blloku i betonit me vrima), pasisje tjera s’kishte. Zjarre të vogla ka pasur, por janë fikur me fikset e zjarrit. Kishte njerëz të tjerë që merreshin me ato punë. Në Gërdec ishte baruti i dy ditëve, pasi nuk kishte vend në konteiner për ta vendos dhe nuk ishte dërguar as në fabrikë. Ditën e ngjarjes iku Dritani. Unë dola dhe porosita rojen të mos fuste njeri brenda. Ngjarja ndodhi kur sapo isha largu 200 metra më poshtë. Zjarri ka fillur aty ku bëhej demontimi.’, dëshmoi Muça.
Sipas tij, baruti trasportohej me karroca dhe kur prisheshin karrocat i riparonte një person me emrin Deli, i cili e kishte shpinë aty afër.
“Sipas asaj që më kanë treguar puntorët, zjarri ka filluar tek një karrocë me barut. Karroca i ishte prish djalit të atij Deliut. Ai e kishte dërguar në shtëpi dhe e kishte ngjit. Unë atë ditë s’i kam dhënë leje askujt. Deliu i thoshte drejtorit Dritanit që i saldonte ai karrocat që dëmtoheshin nga dy- tre në ditë. Dua të them diçka. Babëzia e ushtrisë për të sjellë sa më shumë municion dhe babëzia e punëtorëve për të bërë sa më shumë punë për të arritur normën bënin që të shkeleshin rregullat në punë. Të më thuash sot që të shkosh të bësh atë punë sikur 1 milion në ditë të më japin nuk shkoj më”, tha Muça.
