Deputetja e Partisë së Lirisë, Erisa Xhixho ka reaguar në lidhje me protestën që po mbahet sot në Tiranë, në shenjë revolte kundër dhunës ndaj 3-vjeçares në një kopsht privat.
Përmes një mesazhi në ‘Facebook’, Xhixho thekson se nuk do të heshtin kurrë për fëmijët, ndërsa shton se; “Sot fajtore nuk është vetëm edukatorja e dhunshme, por edhe koleget, drejtuesit e kopshtit dhe ministria që mbyll një sy para institucioneve të tilla që veprojnë hapur në shkelje të ligjit.”.
REAGIMI I XHIXHOS
Nuk do të heshtim kurrë për fëmijët tanë! Në protestën kundër dhunës sot para Ministrisë së Arsimit.
Ngjarja e rëndë në një kopsht të Tiranës, ku një vajzë vetëm 3 vjeç u dhunua nga edukatorja, njeriu të cilit prindërit çdo ditë i besojnë gjënë më të shtrenjtë, duhet të na shërbejë si kambanë alarmi.
Është e patolerueshme dhe duhet ndëshkuar çdo formë abuzimi në institucionet arsimore publike apo private. Çdo përpjekje për të mbuluar ngjarje të tilla të rënda i bën bashkëfajtorë të gjithë ata që janë pjesë e zinxhirit edukues.
Sot fajtore nuk është vetëm edukatorja e dhunshme, por edhe koleget, drejtuesit e kopshtit dhe ministria që mbyll një sy para institucioneve të tilla që veprojnë hapur në shkelje të ligjit.
Sot fajtore është Policia e Shtetit, e cila duhej të niste verifikimet që në momentin që vajza u paraqit në spital me plagë.
Duhet drejtësi dhe ndëshkim për çdo edukator apo mësimdhënës abuzues, çdo institucion ku dhuna gjen hapësirë, çdo punonjës publik që neglizhon ngjarje të tilla të rënda.
Sot zëri i prindërve të vogëlushes 3-vjeçare është zëri i të gjithëve ne!
